Pamjet që shihen tregojnë se sa të vështirë e kanë shqiptarët e Kosovës të ndahen nga flamuri kuq e zi.
Qendra e Prishtinës është e veshur me këto dy ngjyra sot, në 96 vjetorin e shpalljes së pavarësisë së Shqipërisë, pavarësisht faktit se në Kosovë kjo ditë më nuk figuron në listën e festave zyrtare.
Në shtizat e hekurit të institucioneve qendrore të Kosovës nuk ka gjetur vend flamuri kombëtar i shqiptarëve krahas flamurit të Kosovës dhe flamujve të vjetëruar të organizatave kryesore ndërkombëtare që kryejnë misione në këtë shtet të ri. Në Ligjin për Festat në Kosovë, dita e 28 Nëntorit figuron si "Dita e Shqiptarëve" pasi që pakoja e Ahtisarit ia ka ndaluar këtij shteti do referencë të historisë kombëtare.
Por qytetarët nuk donë t'ia dinë se çka shkruan në këtë ligj. Organizata joqeveritare të Kosovës, që nga mëngjesi I së premtes kanë nisur stolisjen e qendrës së Prishtinës me flamuj kuq e zi në pritje të manifestimit qendror që do të mbahet në mbrëmje. Motoja e festimeve të sinkronizuara në Tiranë, Prishtinë dhe Shkup sivjet është quajtur "Jemi Një".
"Po e përjetojmë shumë mirë këtë festë pas pavarësisë, populli ynë i bashkuar. Ua uroj festën të gjithëve", tha Ali Kadriu, qytetar.
Një qytetar nga Tropoja deklaroi: "Kjo festë është madhështore. Me 1912 populli shqiptar i bashkuar nën drejtimin e Ismail Qemailit dhe Isa Boletinit ngriti flamurin më 28 Nëntor në Vlorë më 1912".
Ndërsa, një qytetar tjetër tha se kjo është një festë e madhe pas pavarësisë, por me këto 6 pikat pak na kanë prishur disponimin.
Krahas vendosjes së flamujve, OJQ-të e Kosovës kanë organizuar edhe një ekspozim të prodhimeve vendore të Kosovës në të cilin përve ushqimeve janë prezantuar edhe artizanate të ndryshme tradicionale shqiptare.
