Ekipe të huaja kërkim shpëtimi po shkojnë në Japoni për të ndihmuar vendin pas tërmetit dhe cunamit shkatërrimtar.
Zyra e Kombeve të Bashkuara për Koordinimin e Çështjeve Humanitare në Gjenevë tha se Japonia ka miratuar arritjen e ekipeve të specialistëve nga Australia, Zelanda e Re, Korea e Jugut dhe Shtetet e Bashkuara.
Sekretari i Përgjithshëm i OKB-së Ban Ki-Moon tha se bota është e “tronditur dhe e trishtuar” nga shkatërrimet në Japoni dhe u zotua se Kombet e Bashkuara do të bëjnë gjithë çka që është e mundur për të ndihmuar.
Në Britani, zyra e Ministrisë së Jashtme tha sot se Japonia ka kërkuar ndihmë nga Britania por nuk dha hollësi të tjera.
Departamenti amerikan i mbrojtjes njofton se të paktën 6 anije tjera të marinës amerikane po përgatiten të marrin pjesë në përpjekjet për të ndihmuar zonat e prekura nga tërmeti dhe cunami në Japoni.