Presidenti i Shteteve të Bashkuara Barak Obama dhe kryeministri i Japonisë Jukio Hatojama diskutuan sot në Tokio aleancën e sigurisë mes dy vendeve, si dhe çështjet e Afganistanit, mosproliferimit bërthamor dhe ndryshimet klimatike.
Duke folur në konferencën e përbashkët për shtyp, dy liderët gjithashtu thanë se do të fillojnë të rishikojnë aleancën e tyre 50 vjeçare.
Hatojama tha se aleanca ka nevojë t’u përshtatet kohëve që po ndryshojnë, ndërsa Obama tha se aleanca SHBA-Japoni ishte “themel” për paqen në Azi.
Lidhur me Afganistanin, presidenti amerikan deklaroi.
“Kryeministri dhe unë diskutuam për bashkëpunimin tonë lidhur me Afganistanin dhe Pakistanin. Unë e falënderova popullin dhe kryeministrin e Japonisë për përkushtimin e fuqishëm prej 5 miliardë dollarëve në pesë vitet e ardhshme, në mbështetje të përpjekjeve tona në Afganistan, si dhe përkushtimin prej një miliardë dolarë për Pakistanin”, tha Obama.
Japonia ishte ndalesa e parë e Obamës në turneun nëntë ditor në Azi.
Ai gjithashtu do të vizitojë Singaporin, ku do takohet me liderët e rajonit, si dhe Kinën dhe Korenë e Jugut.