Nazim Bllaca nga fshati Ribar i Madh, është paraqitur dje para gazetarëve dhe ka rrëfyer se ka qenë pjesëtar i SHIK-ut dhe ka kryer një vrasje si dhe ka marr pjesë në përgatitjen e disa të tjerave. Nazim Bllaca është personi i paraqitur në video CD-në të cilën për gazetarë e kanë shpërndarë deputetët Gani Geci dhe Adem Salihaj, ndaj të cilëve me rrëfimin e Bllacës , janë kryer atentate me urdhër të kreut të SHIK-ut.
Nazim Bllaca u ka thënë gazetarëve se gjatë veprimtarisë së tij në SHIK ai ka vepruar nën urdhrat e disa personaliteteve të njohura publike e politike në vend, në mesin e tyre Azem Syla dhe Fatmir Xhelili, aktualisht zëvendësministër i Punëve të Brendshme.
Lidhur me këtë zhvillim,Adem Salihaj edhe për sot ka paralajmëruar prononcim për media .
Ndërkohë që apostrofuarit në këtë prononcim Azem Syla dhe Fatmir Xhelili kanë mohuar deklaratat e Ballacës .
Lidhur me këtë ngjarje, Polica e Kosovës ka deklaruar se janë ndërmarrë të gjitha veprimet duke siguruar vendbanimin e Nazmi Bllacës në Ribar të Madhë si dhe të dy deputetëve të LDD,Gani Geci dhe Adem Salihaj .
Policia e Kosovës bën të ditur se me këtë rast është duke u marrë Policia e Prokuroria speciale e EULEX-it.
Zyrtarët e policisë së Kosovës kanë deklaruar se janë të gatshëm për të vepruar në bazë të urdhëresave që atyre u vijnë nga institucionet përgjegjëse.
Partia Demokratike e Kosovës, zyrtarë të së cilës janë përmendur në rrëfimin e Nazim Bllacës, përmes një komunikate ka ftuar dhe ka dhënë përkrahje të plotë organeve të drejtësisë në zbardhjen e së vërtetës dhe t'i japin fund tendencave për shkatërrim dhe denigrim të sistemit tonë të drejtësisë me qëllim të zhdukjes të së vërtetës dhe mbulimit të krimit.
