Përfaqësuesja e lartë e BE-së për politikën e jashtme, Ketrin Eshton i ka cilësuar bisedimet Kosovë- Serbi si një "shans të vërtetë".
"Tani është koha e duhur të fillojmë", tha Eshton të martën pas mbërritjes së delegacioneve nga Prishtina dhe Beogradi në Bruksel për bisedimet dyditore, të parat që nga deklarimi i pavarësisë së Kosovës.
"Të zgjidhësh problemet mbi bazën e dialogut është një metodë evropiane dhe objektivat e bisedimeve janë të nxisin bashkëpunimin mes Prishtinës dhe Beogradit si edhe ta afrojnë Beogradin më shumë me BE-në. Bisedimet zhvillohen për të ashtuquajturat çështje teknike, që prekin jetën e përditshme të qytetarëve".
Një diplomat i BE-së është shprehur të martën se "ne shpresojmë që të nisim dialogun për çështje të thjeshta, dhe ato në ardhmen mund të thyejnë akullin".