Partia Demokratike ka përgënjeshtruar deklaratat e deputetes të PS-së Mimi Kodheli e cila ka theksuar se përfaqësuesin e PD-së po pengojnë numërimin e votave.
Në një konferencë për shtyp zëdhënësja e PD-së Albana Mustafaraj i ka cilësuar si të pavërteta deklaratat e Kodhelit duke shtuar se asnjë minibashki komisionerët nuk kanë ndërprerë numërimin.
“Në asnjë rast dhe asnjë minibashki komisionerët e Partisë Demokratike nuk kanë ndërprerë procesin pa konsensusin e kolegëve të PS-së, konsensus i cili është thyer nga komisionerët e PS-së që kanë ndërprerë numërimin në mënyrë të njëanshme” theksoi Mustafaraj.
Më tej Mustafaraj ka përgëzuar komisionerët e PD-së për punën e palodhur në përmbyllje të procesit të numërimit të votave ndërsa theksoi se PD-ja është e angazhuar që të numërohet çdo votë në mënyrë sa më të shpejtë.