Në Shqipëri vrasja e dy ditëve më parë në Himarë e 35 vjeçarit Aristotel Guma solli sot reagimet nga autoritet dhe politika shqiptare të cilat e dënuan atë si një akt të shëmtuar dhe kërkuan vënien përpara drejtësisë së autorëve. Himarioti 35 vjeçar Aristotel Guma humbi jetën pasi u përplas nga një makinë e cila drejtohej nga një grup të rinjsh me të cilët ai kishte shkëmbyer më parë debate të ashpra. Vrasja krijoi tension në Himarë. Banorët e qytetit të Himarës bllokuan për më shumë se 13 orë aksin rrugor që e lidh këtë qytet me Vlorën, në shenjë proteste sipas tyre ndaj vrasjes së qëllimshme të një të riu, vetëm pse ka folur në greqisht.