Tre godina të reja shkollore kanë hapur dyert për nxënësit në qytetin e Kukësit duke ndikuar ndjeshëm në rritjen e nivelit të procesit mësimor. Kështu disa qindra nxënës të fshatit Nangë,të komunës Bicaj të Kukësit do të mësojnë në një godinë trekatëshe të re, po ashtu edhe nxënësit e fshatit Zapod, si dhe ata të fshatit Shishtavec.
Gjatë këtij viti shkollor do të fillojë të funksionojë edhe konvikti i ri i shkollës së mesme të Kukësit me kapacitet 400 konviktorë me kushte hotelerie bashkëkohore.
Drejtuesit e shkollave shprehen se ky vit shkollor do jetë mjaft frytdhënës pas përmirësimit të kushteve të infrastrukturës dhe bazës materiale.
Rrethi i Kukësit ka gjithsej 59 shkolla, prej të cilave 9 të mesme dhe të tjerat 9-vjeçare. Shkolla e mesme e përgjithshme në qytetin e Kukësit, me rreth 1.500, nxënës përfshin edhe disa degë profesionale, disa prej të cilave do të mbyllen për shkak të mungesës së interesit dhe për tu hapur të reja.
