Kryeministri i Kosovës, Hashim Thaçi i ka telefonuar mbrëmë Kryeministrit të Shqipërisë, Sali Berisha për t'i shprehur solidaritetin dhe mbështetjen për situatën e krijuar në zonat e përmbytura në rrethin e Shkodrës.
Kryeministri Thaçi i shprehu Kryeministrit Berisha gatishmërinë e qeverisë së Kosovës për t’i ardhur në ndihmë qeverisë shqiptare në përballimin e situatës së krijuar, si dhe për të mbështetur banorët e këtyre zonave me qëllim minimizimin dhe lehtësimin e pasojave nga përmbytja.
Kryeministri Thaçi e informoi Kryeministrin Berisha se qeveria e Kosovës ka vendosur që të nisë në Shqipëri efektivë të Forcave të Sigurisë së Kosovës për të ardhur në ndihmë të banorëve në këto zona.
Kryeministri Berisha e falënderoi Kryeministrin Thaçi për mbështetjen dhe solidaritetin nga ana e qeverisë së Kosovës.
