Tiranë- Seanca plenare e Kuvendit nuk do të mblidhet sot pasdite pasi deputetët janë të angazhuar në pjesën më të madhe të tyre.
Në një informacion të Kuvendit bëhet e ditur se seanca plenare e planifikuar të zhvillohej sot është shtyrë.
“Njoftohen të gjithë deputetët se, seanca plenare e ditës së enjte, dt 09.12.2010 nuk do të zhvillohet për shkak të impenjimit të deputetëve në zonat e përmbytura, në funksion të përballimit sa më të mirë të situatës së fatkeqësisë natyrore, në Qarkun e Shkodrës”, - thuhet në njoftimin zyrtar.
Burime jozyrtare thonë se po shqyrtohet mundësia e zhvillimit të kësaj seance ditën e nesërme.
Thuajse të gjithë deputetët e mazhorancës ndodhen në lëvizje të shpeshta në qarkun Shkodër.
Po ashtu edhe deputetë të opozitës kanë shkuar në zonën e përmbytjeve për të qenë pranë të dëmtuarve nga reshjet dhe shkarkimet e ujërave nga digat e hidrocentraleve.
