Lëvizja Vetëvendosje nëpërmjet një konference për medie, shprehu shqetësimin e saj në lidhje me Radio Televizionin e Kosovës (RTK), ku sipas drejtuesve të kësaj partie, RTK është kapur nga klani Pronto, dhe veçanërisht me veprimet e fundit të Menaxhmentit të televizionit publik.
Nënkryetari i parë i kësaj partie, Dardan Sejdiu, dhe deputetja e nënkryetarja e Kuvendit të Kosovës, Aida Dërguti, përveç se folën për gjendjen e rëndë të transmetuesit publik RTK, kërkuan reagim nga asociacionet dhe organizatat e shoqërisë civile, në lidhje me padrejtësitë e këtij mediumi ndaj opozitës, pasi që ditëve të fundit iu mohua e drejta e paraqitjes kryetarit të Vetëvendosjes, Visar Ymerit.
Sejdiu tregoi se RTK i mohoi Ymerit paraqitjen në emisionin ‘Debat’ të Ridvan Berishës, ndonëse fillimisht kryeredaktori Xhymret Veliu ishte përgjigjur pozitivisht për zyrën e mediave të VV.
Ai tha se kjo ishte ndërhyrje e menaxhmentit të RTK-së, që kishte marrë këtë vendim “për shkak të gjuhës kritike ndaj RTK-së nga ana e VV”.
Sejdiu: RTK i anulon intervistën kryetarit të VV, Visar Ymeri
“Pasi ishin realizuar disa intervista me radhë në RTK me Isa Mustafën dhe Kadri Veselin, kryeredaktori i këtij medium, Xhymret Veliu para një jave iu përgjigj pozitivisht kërkesës së drejtuesit të zyrës sonë për medie, që të realizohej edhe një intervistë me kryetarin e Lëvizjes Vetëvendosje, Visar Ymeri. Intervistat ishte e caktuar që të realizohet sot, pra ditë e premte dhe për këtë zyra e mediave e Lëvizjes Vetëvendosje ishte marrë vesh edhe me autorin e emisionit ‘debat’ të Ridvan Berishës. Sot zyra për medie e LVV u njoftua që kjo intervistë nuk do të realizohet, ngase menaxhmenti i RTK-së ka vendosur që, po citoi: për shkak të gjuhës kritike të LVV ndaj RTK-së subjektit tonë do t’i mohohet e drejta që të paraqes qëndrimet tona në këtë televizion publik”, theksoi Sejdiu.
Ai tha se ky vendim dëshmon edhe një herë se deklaratat e VV-së janë të vërteta. Sipas tij, fatkeqësisht RTK është kapur nga Qeveria dhe klani Pronto dhe për më shumë është shndërruar në televizion që mbron krimin e organizuar qeveritar në Kosovë.
Sejdiu: Ky vendim është dëshmi që deklaratat tona ndaj RTK-së janë të vërteta
“Ky vendim është dëshmi që deklaratat tona ndaj RTK-së janë të vërteta. RTK fatkeqësisht është kapur nga Qeveria dhe klani Pronto dhe për më shumë është shndërruar në televizion që mbron krimin e organizuar qeveritar në Kosovë. Po e shihini edhe vet me përgjime kemi organizim kriminal në Kosovë. Politikat redaktoriale të televizionit tonë publik si duket po bëhen nga Hashim Thaçi, Isa Mustafa e Kadri Veseli”, tha ai.
Ai po ashtu ftoi organizatat e shoqërisë civile dhe asociacionet që të reagojnë ndaj këtij rasti.
Kritika të ngjashme kishte edhe në fjalën e nënkryetares së Kuvendit të Kosovës, Aida Dërguti, e cila përmendi rastin e sulmit me bombë në RTK, të cilin sulm, RTK e lidhi me Vetëvendosjen, teksa Prokuroria e Policia ende nuk kanë gjetur fajtorët.
Dërguti: RTK-ja është bërë si shtëpi për Qeverinë dhe klanin Pronto
“RTK-ja është bërë si shtëpi për Qeverinë dhe klanin Pronto. Kur Isa Mustafa mbanë konferencë për të gënjyer popullin, RTK e transmeton direkt në gjitha kanalet e saj. Kur Hashim Thaçi i drejtohet qytetarëve për t’i mashtruar e frikësuar, RTK e transmeton direkt në gjitha kanalet e saj. RTK i shfaq direkt kërcënimet dhe gjuhën ofenduese të Isa Mustafës e Hashim Thaçit, kurse i pengon kritika racionale dhe e drejtë e Lëvizjes Vetëvendosje”, theksoi ndër të tjera, deputetja Dërguti.
Menaxhmenti i RTK-së, sipas saj me vendimet e tilla e ka bërë RTK-në pjesë të krimit të organizuar në Kosovë, duke keqpërdorur edhe paranë e qytetarëve, në mesin e të cilëve janë edhe votuesit dhe përkrahësit e VV-së.
Duke e quajtur RTK-në propagandues të drejtpërdrejtë të Qeverisë, dhe duke e krahasuar këtë rast me vendet autoritare, u kërkua reagim dhe mobilizim ndaj padrejtësive të tilla.
