(E plotësuar) - Dy ditë para përfundimit të mandatit, drejtori i Agjencisë së Kundër Korrupsionit, Hasan Preteni në konferencën e fundit për media vlerësoi të arriturat e këtij institucioni që është themeluar tash e 10 vjet.
Pavarësisht rritjes së përqindjes së korrupsionit në vend në bazë të raporteve ndërkombëtare, Preteni tha se në bazë të informatave të ndryshme kanë arritur ta parandalojnë korrupsionin duke ngritur kallëzime penale për zyrtarë të ndryshëm. Sipas tij, për këtë dukuri numri total i personave kundër të cilëve është ushtruar kallëzime penale e kalon shifrën mbi 1 mijë e 500 zyrtarë.
Preteni: 1 mijë e 802 raste ka pasur dyshime të bazuara për korrupsion
“Por, 1 mijë e 802 raste ka pasur dyshime të bazuara dhe pas përfundimit të hetimeve, hetime preliminare, hetime administrative në 706 raste kundër 1 mijë e 434 zyrtarëve kemi ushtruar kallëzim penal. Në rreth 50 raste nuk kemi mundur t’i identifikojmë numrin e zyrtarëve të dyshimtë të përfshirë në këto aktivitete korruptive. Por me siguri në mesin e 50 informatave janë përfshirë së paku 100 zyrtarë. Kështu që numri total i personave kundër të cilëve kemi ushtruar kallëzime penale e kalon shifrën mbi 1 mijë e 500 zyrtarë”, thotë Preteni.
Edhe pse Preteni përmendi shumë shifra për lëndë korruptive ai nuk tregoi emra, edhe pse ai tha këta zyrtarë janë të njohur për prokuroritë. Ai tha se të korruptuar ka gati në të gjitha institucionet e shtetit.
Preteni: Të korruptuar ka në Qeveri, komuna, prokurorë dhe gjyqtarë
“Të gjithë këta emra janë të njohur për Prokuroritë, në mesin e tyre ka zyrtarë të lartë të institucioneve qendrore, pushtetit lokal, institucioneve të pavarura , gjyqtarë dhe prokurorë”, tha Preteni.
Tek parandalimi i korrupsionit, Preteni tha se nga deklarimi i pasurisë në Agjenci tani janë sistemuar saktësisht 28 mijë e 320 formularë. Deri në vitin 2010, formularët nuk janë publikuar, pas kësaj kohe, sipas tij, janë publikuar të dhënat të cilat nuk bien ndesh me ligjin për ruajtjen e të dhënave personale.
Ai tha se përqindja e deklarimit të pasurisë është shumë e mirë, dhe vetëm në vitin 2012 ka qenë nën 95 përqind. Sipas ti, në shumicën e rasteve ka pasur 98 për qind e më shumë se 99 përqind.
Preteni: Kontrollimi i pasurisë së zyrtarëve të lartë publik
“Pas publikimit të të dhënave, ne kemi vazhduar t’i kontrollojmë formularët, kontrollit iu kanë nënshtruar të gjithë formularët , kurse kontrollit të plotë rreth 25 për qind të tyre, ose 7 mijë formularë. Për çdo vit 25 përqind që i bie se për periudhën 4 vjeçare janë kontrolluar të gjithë. Nëse një zyrtarë i lartë ka qenë 4 vjet në pozitën e zyrtarit të lartë domosdoshmërisht formulari i tij është kontrolluar”, tha ai.
Për deklarim të rrejshëm të pasurisë, Agjencia ka ushtruar 70 kallëzime penale.
Preteni më tej tha se kjo Agjenci ka arrit të parandaloi mbi 100 milionë euro në fushën e prokurimit publik.
Preteni: Vlera e tenderëve të stopuar e kalon shifrën e 108 milionëve
“Korrupsioni në fushën e prokurimit publik fillon qysh në fazën e përcaktimit të kritereve, këtë fushë e kemi monitoruar me prioritet dhe falë vigjilencës së zyrtarëve të Agjencisë i kemi trajtuar 454 raste. Shumica prej tyre inflamacionet janë siguruar në rrugë zyrtare... vlera e tenderëve të stopuar e kalon shifrën e 108 milionëve. Dhe 70 raste i kemi monitoruar aktivitetet tenderuese, kurse në fazën e vlerësimit kemi qenë të pranishëm për t’ju shmangur ose për të rritur përgjegjësinë”, tha Preteni.
Për konflikt të interesit, kjo Agjenci ka trajtuar 1 mijë e 246 raste, prej tyre 796 raste zyrtarët iu kanë shmangur konfliktit të interesit, duke i pranuar udhëzimet e Agjencisë. Kurse, në 26 raste është kërkuar largimi i zyrtarëve nga puna.
Kjo Agjenci e cila ka nisur punën në vitin 2006, filloi fillimisht me 8 zyrtarë, kurse tani ka 40 dhe ka një buxhet të bollshëm dhe kushte të mira për punë. Pasardhës i Hasan Pretenit, është Shaip Havolli.
Preteni: Për 10 vjet mbi 1500 kallëzime penale
Drejtori i Agjencisë së Kundër Korrupsionit, Hasan Preteni në konferencën e fundit për media në këtë pozitë vlerësoi të arriturat e këtij institucioni që është themeluar tash e 10 vjet.
Preteni tha se në bazë të informatave të ndryshme kanë arritur ta parandalojnë korrupsionin duke ngritur kallëzim penal për zyrtarë të ndryshëm.
Ai tha se fusha ku ka korrupsion është sektori i prokurimit. Sipas tij vlera e mjeteve financiare e parandalimit të korrupsionit është 108 milionë euro. Preteni tha se kanë ngritur mbi 1 mijë e 500 kallëzime penale për korrupsion.
