Një çështje që preokupon qytetarët janë edhe pagat e veteranëve të luftës për të cilët është paralajmëruar se Qeveria nuk ka më buxhet për t’i paguar të gjithë veteranët.
Ishte deputetja e AAK-së Time Kadriaj e cila e ka ngritur këtë shqetësim sot gjatë seancës së Kuvendit të Kosovës.
Ajo tha se veteranët e Ushtrisë Çlirimtare të Kosovës edhe pas 17 viteve po përballen me probleme. Sipas saj ka veteranë që nuk kanë marrë pagat e tyre.
Kadriaj: Veteranët kanë probleme për pensione
“Edhe përkundër amendamentit të ligjit ende po ka pengesa në zbatimin e tij dhe edhe sot shumë veteran po përballen me problem sepse nuk po iu paguhet ajo çka u takon me ligj. Ministër kur do të rregullohet kjo çështje dhe kur veteranët do ta marrin pagën e tyre në bazë të ligjit që iu takon?”, e ka pyetur Kadriaj ministrin e Punës dhe Mirëqenies Arban Abrashi.
Ministri Abrashi ka sqaruar ecurinë e gjithë procesit duke thënë se në bazë të informatave që kanë pasur fillimisht është rregulluar edhe puna e buxhetit për veteranët që plotësojnë kushtet për pension.
Abrashi: 28 mijë e 31 veteranë marrin pensione
"Të gjitha informatat që i kemi pas ne si Qeveri ishte se presim një fluks prej 12 deri 14 mijë veteranë të UÇK të cilët nuk kanë të hyra. Pas kësaj ne edhe e kemi hartuar buxhetin së bashku me Ministrinë e Financave buxhet prej 25 milionë eurove i cili përmbush këto kërkesa. Ajo çka ka ndodhë në ndërkohë me hapjen e procesit është se jashtë çdo parashikimi se numri i veteranëve që kanë aplikuar për pension është dyfishuar. Numri i fundit I veteranëve që plotësojnë kushtet për të marrë pensionin është 28 mijë e 31”, sqaroi Abrashi.
Mirëpo ai mohoi se veteranët nuk janë duke i marrë pagat e tyre ndërsa si sfidë e përmendi mungesën e buxhetit për këtë kategori deri në fund të vitit.
Sipas Abrashit me këtë numër që aktualisht janë të evidentuar si veteranë të luftës, Qeverisë i duhen së paku edhe 15 milionë e 700 mijë euro.
Sipas ministrit të Punës numri i atyre që aplikojnë për pensione është duke u rritur nga muaji në muaj dhe as kjo shumë nuk është e mjaftueshme për pensionet e tyre prandaj Abrashi tha se Qeveria do të mundohet që të gjejë ndonjë alternativë tjetër për të paguar pensionet e veteranëve të luftës.
