Thaçi vizitë zyrtare në Shqipëri, ja agjenda

Aktuale

Thaçi vizitë zyrtare në Shqipëri, ja agjenda

Më: 1 tetor 2016 Në ora: 16:28
Hashim Thaçi

Presidenti i Kosovës, Hashim Thaçi, në fillim të kësaj jave do të vizitojë zyrtarisht Shqipërinë.

Sipas njoftimit për media, gjatë qëndrimit të tij në Shqipëri, më 3 dhe 4 tetor,  Thaçi do të takohet me krerët e shtetit.

 “Të hënën (3 tetor), në orën 09:00, presidenti Thaçi do të pritet me ceremoni shtetërore nga Presidenti i Shqipërisë, Bujar Nishani. Ndërsa, në orën 10:30, dy presidentët do të mbajnë edhe një konferencë të përbashkët për medie”, thuhet në njoftim.

Pas takimit me presidentin Nishani,  Thaçi do të pritet nga Kryeministri i Shqipërisë, Edi Rama,  dhe  me kryetarin e Kuvendit të Shqipërisë, Ilir Meta.

Pas takimeve me krerët e shtetit, presidenti Thaçi do të vizitojë familjen e shkrimtarit Dritero Agolli.

Ndërsa, në orën 16:30, presidenti Thaçi do të takohet edhe me liderin e Partisë Demokratike të Shqipërisë, Lulzim Basha.

 Të nesërmen (4 tetor), në orën 09:00, presidenti Thaçi do të vendos kurore lulesh në monumentin “Nëna Shqipëri”.

Ndërsa, në orën 09:30, në Bashkinë e Tiranës do të takohet me kryebashkiakun Erion Velijaj.

Pas këtij takimi, para se të niset për në Bashkinë e Shkodrës, presidenti Thaçi do të vendos gjithashtu kurore lulesh edhe te shtatorja e Adem Jasharit në Tiranë.

Ndërsa, në mesditë, rreth orës 13:00, në Bushat të Shkodrës, presidenti Thaçi do t’i vizitojë futbollistët e kombëtares së Kosovës, të cilët po i bëjnë përgatitjet e fundit për ndeshjen me Kroacinë.

Sot mund të lexoni Shfletoni kopertinat