Shteti i Kosovës ia ka ndaluar Marko Gjuricit të hyjë në Kosovë. Ai kishte planifikuar që të hënën të vizitonte Veriun e Kosovës, por, një vendim i Ministrit të Punëve të Jashtme, Enver Hoxhaj ka bërë që Gjuric të mos lejohet të hyjë në territorin e Shtetit të Kosovës.
Brenda dy javësh, Shefi i Zyrës për Kosovën në Qeverinë e Serbisë, Marko Gjuriq do të përballet me ndalesën e Qeverisë së Kosovës për të mos lejuar të hyjë në territorin e Kosovës.
Vendimin për ndalimin e vizitës së Gjuriqit në Kosovë e ka marrë Ministri i Punëve të Jashtme Enver Hoxhaj.
Burimet kanë treguar se Hoxhaj e ka marrë këtë vendim në konsultim me Kryeministrin Isa Mustafa dhe institucionet e sigurisë së Kosovës.
Ndërkohë, zyrtarëve të tjerë serbë, të cilët kanë planifikuar të vizitojnë Veriun e Kosovës, të hënën, u është lejuar vizita.
Vizita e Gjuriqit e bërë në Graçanicë, më 22 shtator të këtij viti, ishte ndërprerë nga Policia e Kosovës, e cila kishte dëbuar zyrtarin serb nga Kosova me arsyetimin se kishte shkelur marrëveshjen për të mos përçuar mesazhe politike.
