Deputeti i LVV-së, Rexhep Selimi, si anëtar i Komisionit për Punë të Brendshme, ka parashtruar disa pyetje për zëvendësdrejtorin e PK-së, gjatë raportimit të këtij të fundit para Komisionit, për arrestimin e komandatit Nehat Thaqi në Serbi.
Në fund të pyetjeve, Selimi ka uruar kthimin e shpejtë në Kosovë, në liri, të Thaqit.
Pas tij, ka qenë edhe kryesuai i këtij Komisioni, deputeti i AAK-së, Daut Haradinaj që tha se i bashkohet të njëjtit urim. Ai tutje u tall me Policinë, duke thënë se “besoj se edhe Policia i bashkohet këtij urimi, masi ma shumë nuk munden me bo”.
Ndryshe, në Komisionin për Punë të brendshme, u parashtruan pyetje për zëvendësdrejtorin e PK-së Naim Rexha, në lidhje me arrestimin e Thaqit, disa javë më parë në kufirin e Merdarës, nga autoritetet serbe. Rexha po raporton në këtë Komision në mungesë të drejtorit Shpend Maxhuni, që nuk erdhi në mbledhje.
Shumica e pyetjeve nga anëtarët e Komisionit janë të njëjta. Ato kryesisht kanë të bëjnë me atë se a kanë qenë në dijeni Policia dhe Thaqi se ka urdhërarrest ndaj tij në Serbi dhe a është dashur të njoftojë ai eprorët e tij për udhëtimin, edhe pse ka qenë udhëtim privat.
Arrestimi i Thaqit, sipas pyetjeve të anëtarëve të Komisionit, ka qenë politik, pasi ai të paktën dy herë tjera, në të kaluarën, thuhet ta ketë kaluar kufirin dhe të ketë qenë në Serbi.
