Në mbledhjen e Këshillit Kombëtar për Integrime Evropiane të Kosovës, ku po diskutohet për izolimin e vendit për shkak të mos liberalizimit të vizave, është paraqitur shqetësimi që qytetarët e Kosovës ende jetojnë të izoluar sa i përket lirisë së lëvizjes.
Ministri i Punëve të Jashtme të Kosovës, Enver Hoxhaj deklaroi se Kosova ka bërë hapa të mëdhenj për integrim në instancat evropiane, mirëpo nuk ia ka arritur cakut. Mosarritja e cakut, sipas ministrit Hoxhaj është për shkak të mos marrjes së vendimit nga Bashkimi Europian për ta lejuar lëvizjen e lirë të qytetarëve të Kosovës.
Hoxhaj ka shprehur shqetësimin që qytetarët e Kosovës ende jetojnë të izoluar dhe pa liri të lëvizjes.
“Kosova ka bërë hapa të mëdhenj drejt integrimit euroatlantik, mirëpo qytetarëve tanë ende nuk u është dhënë mundësia të lëvizin lirshëm. Qytetarët tanë ende jetojnë të izoluar, sikurse në një ishull, me vështirësi për t’u qasur jashtë Kosovës, padrejtësisht”, ka deklaruar ministri Hoxhaj.
