(E plotësuar)- Shoqatat e dala nga lufta e UÇK-së dhe qytetarët e Skenderajt, bashkë me zyrtarë komunal të kësaj komune sot mbajtën një marsh protestues për të shprehur pakënaqësitë e tyre për vendimet në rastin ‘Drenica I’ e veçanërisht për rastin e vendimit ndaj Sami Lushtakut.
Përfaqësuesi i Këshillit Organizativ Xhevat Dervishi tha se me anë të kësaj proteste shprehin pakënaqësitë e tyre me moton: “Të zhvishet drejtësia nga politika”.
“Ajo çka ne sot bëmë është një marsh protestues së bashku me shoqatat në lidhje me vendimin që ka dhënë Gjykata në lidhje me rastin ‘Drenica’. Kjo ishte rruga që na bën të kërkojmë që drejtësia të jap fjalën e vet. Kësaj radhe …kërkojmë ne që Gjykata supreme ta thotë fjalën e vet dhe ta zhvesh këtë rast drejtësinë prej politikës”, tha Dervishi.
Deputeti i Kuvendit të Kosovës i cili mori pjesë në këtë protestë, Bekim Haxhiu, shprehi pakënaqësinë e tij për vendimet e gjykatave, të cilat sipas tij janë absurd ndaj Sami Lushtakut. Ai tha se Lushtaku është dënuar për një vrasje inegzistente, për vrasje, të cilën sipas tij, Gjykata e Apelit pastaj e liron.
“Është shprehjeje e pakënaqësisë për vendimet tërësisht absurde. Fillimisht Lushtaku është dënuar për një vrasje inegzistente, për vrasje të cilën gjykata e Apelit pastaj e liron dhe është liruar për përgjegjësi komanduese nga Gjykata Themelore, ndërsa, Gjykata e Apelit pastaj e ka ngarkuar. Ne kemi dy vendime liruese për Lushtakun për çka është akuzuar fillimisht, prandaj, që qytetarët kanë të drejtë me shpreh pakënaqësinë e tyre”, tha Haxhiu.
Qytetari Hashim Meha, i cili mori pjesë në protestë tha se dënimet për rastin ‘Drenica I’ dhe ‘Drenica II’, janë vendime politike dhe elemente të veprës penale, sipas tij, nuk ka. Meha tha se të gjitha vendimet janë politike, posaçërisht për gjeneralin Sami Lushtaku dhe të gjithë të tjerët.
“Ne kemi dalë të protesojmë sot për dënimin e Grupit ‘Drenica I’ dhe ‘Drenica II’, të cilët padrejtësisht janë dënuar në shkallën e parë dhe të dytën. Ai vendim është politik dhe elemente të veprës penale nuk ka, vendimet të gjitha janë politike posaçërisht për gjeneralin Sami Lushtaku dhe të gjithë të tjerët. Andaj, kërkojmë prej drejtësisë që ta jap fjalën tek shkalla e tretë Gjykata Supreme ta nxjerrë verdiktin dhe t’i lirojë nga të gjitha aktakuzat të cilat janë pa kurrfarë baze ligjore. Me një dëshmitarë të rrejshëm nuk dënohet askush, me një njeri të sëmurë psiqikisht”, tha Meha.
Edhe qytetari Musa Buzhala, shpreu pakënaqësinë e tij për vendimet e marra nga sistemi i drejtësisë që po bëhen kundër ish -ushtarëve të Ushtrisë Çlirimtare të Kosovës dhe komandantëve të UÇK-së.
Marshi protestues në të cilën morën pjesë mijëra qytetarë, ka përfunduar i qetë dhe pa incidente.
Në rastet “Drenica I” dhe “Drenica II” ish-eprorë të UCK-së nga rajoni i Drenicës janë dënuar për krime lufte të cilat supozohet se kanë ndodhur në verën e vitit 1998 në fshatin Likoc të Skënderajt.
Drenica proteston kundër dënimit të pjesëtarëve të UÇK-së
Në Skënderaj u protestua kundër vendimit të Gjykatës së Apelit me anë të së cilës janë dënuar eprorë të UÇK-së për krime lufte.
Protesta në të cilën morën pjesë mijëra qytetarë ka përfunduar e qetë dhe pa incidente.
Përfaqësuesi i Këshillit Organizativ Xhevat Dervishi tha se me anë të kësaj proteste po shprehin pakënaqësitë e tyre për të zhveshur drejtësinë ndaj rastit Drenica 1.
Gjykata e Apelit ka shpallur të pafajshëm kryetarin e Skënderajt Sami Lushtakun për vrasje ndërsa e ka dënuar me 7 vjet burg për përgjegjësi komanduese. Me anë të këtij vendimi janë dënuar edhe ish-komandanti i UÇK-së Sylejman Selimi dhe ish-luftëtarë të tjerë të UÇK-së.
***
Skenderaj proteston kundër dënimit të luftëtarëve të UÇK-së (Drejtpërdrejt)
Në Skenderaj ka filluar protesta me anë të së cilës po kundërshtohet vendimi i Gjykatës së Apelit në lidhje me vendimin për rastin “Drenica I”.
Në këtë vendim janë dënuar kryetari i komunës Sami Lushtaku, Sylejman Selimi dhe pesë ish-komandantë të UÇK-së që vijnë nga ky regjion.
Protesta është thirrur nga shoqatat e dala nga lufta e UÇK-së dhe Këshilli i punëtorëve të administratës komunale në Skenderaj.
***
Skenderaj proteston kundër dënimit të luftëtarëve të UÇK-së
Sot në Skenderaj do të zhvillohet një protestë për të kundërshtuar vendimin e Gjykatës së Apelit në lidhje me vendimin për rastin “Drenica I”.
Në këtë vendim janë dënuar kryetari i komunës Sami Lushtaku, Sylejman Selimi dhe pesë ish-komandantë të UÇK-së që vijnë nga ky regjion.
Protesta është thirrur nga shoqatat e dala nga lufta e UÇK-së dhe Këshilli i punëtorëve të administratës komunale në Skenderaj.
“Protesta do të mbahet më datë 18 nëntor 2016 në Sheshin ‘Adem Jashari’ në Skenderaj nga ora 12:00. Ftohen të gjithë qytetarët e Skenderajt që t’i bashkohen kësaj proteste, në mbrojtje të luftës së UÇK-së dhe pjesëtarëve të saj dhe me kërkesën për vendim të drejtë nga Gjykata Supreme”, thuhet në njoftimin e Shoqatave të luftës.
