Që prej se mbahen zgjedhjet në Kosovën e pasluftës, Partia Demokratike e Kosovës e ka pasur Drenasin një prej çerdheve të saj, ku ka fituar shumicën absolute të votave.
Por, kjo praktikë u ndërpre sot, kur ky subjekt nuk arriti të fitojë votat e nevojshme në rrethin e parë për të udhëhequr me këtë komunë, që është një nga bastionet e saj partiake.
Mbetet të shihet se cili do të jetë rezultati që do të korrë ky subjekt më 1 janar, kur kandidati i tij, Ramiz Lladrovci, dhe ai i NISMA's, Isa Xhemajlaj, do të përballen në balotazh.
Sidoqoftë, rezultati i sotëm i PDK'së flet për ndëshkim, pasi për Lladrovcin kanë votuar rreth 4 mijë votues më pak sesa për ish-Kryetarin e komunës, Nexhat Demaku, i cili u bë shkaktar i zgjedhjeve të jashtëzakonshme, pasi Gjykata e dënoi për krime lufte.
Zyrtarët e PDK'së, që kanë dalë të flasin para mediave për rezultatin e sotëm, dukshëm kanë shfaqur frustrimin e tyre, duke theksuar se në balotazh do t'i kthejnë votat e humbura.
Arsyet që Drenasi po e braktisë PDK'në mund të jenë të shumta: qeverisja e gjatë me këtë komunë; përçarjet në degën e atjeshme rreth kandidatit; mospërfshirja direkte e Hashim Thaçit në fushatë.
Por, në secilën mënyrë, rezultati i sotëm çon një mesazh për këtë Parti: Drenica ka filluar t'ju rrëshqasë nga duart.