Partia Demokratike e Kosovës më në fund ka thyer heshtjen për zgjedhjet në Drenas.
Ndonëse kanë kaluar gati 24 orë që nga rezultatet e para të zgjedhjeve në Drenas, ku PDK për herë të parë që nga paslufta do të shkoj në balotazh, ka ardhur edhe reagimi i PDK-së.
Është njëri nga njerëzit më me ndikim në këtë parti, Xhavit Haliti ai i cili ka folur shkurt për rezultatin e zgjdhjeve, duke thënë se nuk ka shumë komente.
“Rezultatin e zgjedhjeve çka me komentu, është ky që është. Komente nuk kam”, tha ai, duke shpresuar që kandidati i PDK-së, Ramiz Lladrovci do ta fitoj balotazhin.
“Unë, besoj që ka me fitu zotëri Lladrovci”, tha Haliti.
Ndërkaq, deputeti tjetër i PDK-së, Nait Hasani nuk ka dashur që të komentoj rezultatin.
“Nuk kam koment”, tha ai shkurt.
Ndryshe, në zgjedhjet e jashtëzakonshme për kryetar të Komunës së Drenasit, të mbajtura dje, për herë të parë që nga paslufta, PDK nuk ka arritur që këtë komunë ta fitoj pa balotazh.
Në rrethin e dytë të zgjedhjeve për kryetar të Drenasit që do të mbahet më 1 janar, do të përballen kandidati i PDK-së, Ramiz Lladrovci, dhe ai i Nismës për Kosovën, Isa Xhemajlaj.