Presidenti i Kosovës, Hashim Thaçi, sot ka pritur në takim shefen e EULEX-it, Alexandra Papadopoulou, me të cilën ka biseduar për bashkëpunimin në mes të institucioneve të shtetit të Kosovës dhe EULEX-it.
Gjatë këtij takimi, Thaçi është shprehur se EULEX-i e ka përkrahjen e institucioneve në përmbushjen dhe përmbylljen e misionit të vet.
“Ju përgëzoj për bashkëpunimin e mirë me të gjitha institucionet e Kosovës, me qeverinë dhe me ministritë, me organet e rendit e të ligjit”, ka thënë Thaçi.
Ndërsa, shefja e EULEX-it, Papadopoulou,është shprehur e kënaqur me bashkëpunimin me institucionet e Kosovës dhe përpjekjet për fuqizimin e sundimit të ligjit.
Gjithashtu, ajo e ka njoftuar Thaçin se EULEX ka përfunduar me procesin e ristrukturimit.
“Por, puna jonë vazhdon si më parë. Llogarisim në përkrahjen tuaj që të vazhdojmë më tutje me suksesin e misionit të EULEX-it”, ka thënë Papadoupoulou.
Presidenti Thaçi konfirmoi përkrahjen e institucioneve të Kosovës për EULEX-in. “Kemi synim të njëjtë, kemi vizion të njëjtë, të afrojmë Kosovën drejt BE-së”, ka thënë Thaçi./BS