Sot, në Ministrinë e Diasporës, ministri Valon Murati priti anëtarët e udhëheqësisë së Kuvendit të të Rinjve të Kosovës.
Deniza Limani, kryetare e Kuvendit të të Rinjve të Kosovës, e njoftoi ministrin Murati për punën dhe prioritetet e këtij kuvendi, si avancimi i të rinjve në vendimmarrje për çështjet që i takojnë rinisë, luftimi i dukurive negative tek të rinjtë etj.
Në këtë takim u diskutua edhe për bashkëpunimin e të rinjve tanë me ata në diasporë, veçanërisht me rrjetet e të rinjve dhe studentëve shqiptarë nga diaspora, por edhe nga vendi.
Gjithashtu, ministri Murati i inkurajoi të rinjtë që të marrin pjesë në aktivitetet që Ministria e Diasporës i zhvillon gjatë gjithë vitit, veçanërisht në muajt e verës, kur i organizon “Ditët e Diasporës” .
