Mediat serbe vazhdojnë të kenë temë kryesore në ballinat e tyre raportet e tensionuara Kosovë-Serbi me spekulime të ndryshme që kanë të bëjnë me deklarata të liderëve shtetërorë në Kosovë madje edhe në Shqipëri.
Gazeta serbe sot e ka kryetitull në ballinë kryeministrin e Shqipërisë, Edi Rama, duke e akuzuar se po kërcënon serbët.
“Edi Rama kërcënon me luftë: Serbë, të gjithëve do t’ju shkelim në qoftë se vetëm një centimetër do të hyni në Kosovë”, ky është kryeartikulli i gazetës serbe.
Artikulli i gazetës serbe i referohet paraqitjes së fundit në kryeministrit shqiptar bashkë me Presidentin e Kosovës, Hashim Thaçi në një emision televiziv.
Media shkruan se Thaçi ka kërcënuar se serbët do të jenë të detyruar ta rrënojnë murin në Mitrovicë, kurse Rama haptas ka porositur se do ta sulmojë Serbinë, shkruan gazeta.
“Derisa Beogradi apelon për paqe dhe përmbajtje, shqiptarët nuk pushojnë duke kërcënuar me luftë. Rama ka shkuar edhe një hap më tutje duke kërcënuar se ‘Kosova dhe Shqipëria bashkarisht do ta mbrojnë territorin e tyre’ dhe se do të reagojnë në çdo ndërhyrje të Serbisë në territorin e Kosovës”, shkruan gazeta serbe.
