Ramush Haradinaj do që ta paraqesë veten si viktimë politike, por ai është një kriminel lufte, ka thënë ministri i Punëve të Jashtme të Serbisë, Ivica Daçiq.
Këtë deklaratë për Radio Televizionin e Serbisë, kryediplomati serb e bëri në kohën kur Gjykata e Apelit në Colmar të Francës e shtyu për 2 mars vendimin për lirimin ose ekstradimin në Serbi të ish-kryeministriit të Kosovës dhe liderit të AAK-së, Ramush Haradinaj.
Para dy javësh kjo gjykatë kishte vendosur ta lirojë me kusht atë, derisa priste kërkesën e Serbisë për ekstradim
Haradinaj ishte arrestuar më 4 janar nga polica franceze bazuar në një urdhërarrest të Serbisë të vitit 2004.
Ai poashtu ka folur edhe për formimin e ushtrisë së Kosovës, duke shtuar se Prishtina në bazë të Rezolutës 1244 nuk ka të drejtë që ta formojë ushtrinë e Kosovës dhe se Serbia me të gjitha mjetet politike do të luftojë kundër formimit të saj.
“Ata nuk munden që pa votat e Listës Serbe të sjellin një vendim të tillë. Për një gjë të tillë nuk kanë të drejtë në bazë të rezolutës 1244 dhe një vendim i tillë do të ishte i paligjshëm. Sipas kësaj rezolute të vetmet forca të armatosura janë ato të OKB-KFOR-it”, ka thënë ai për Radio Televizionin e Serbisë.