(E plotësuar) - Të rinjtë e AAK-së sot kanë mbajtur një aksion simbolik kundër Qeverisë, para vendit ku po mbahej Samiti i Komisioneve për punë të jashtme të shteteve të Evropës.
Ata kanë shprehur pakënaqësinë e tyre në lidhje me qeverisjen në Kosovë duke thënë se Kosova po udhëhiqet nga njerëz të cilët shikojnë interesat e tyre e jo interesat e vendit.
Diellza Hoti kryetarja e të rinjve të AAK-së vlerësoi punën e shteteve evropiane duke thënë se Kosova ende ka nevojë për ta, pasi që sipas saj qeverisja e Kosovës është e paaftë të përfaqësojë interesat e qytetarëve.
Hoti gjithashtu kërkoi edhe nga faktori ndërkombëtar që të marrin masa në përshpejtimin e lirimit të Ramush Haradinajt.
Hoti: Kjo Qeveri i ka sjellë dëme Kosovës
“qëllimi është të sensibilizojmë, ndikojmë në rritjen e vetëdijesimit të faktorit ndërkombëtar që Kosova nuk është në rrugën e duhur. Kosova udhëhiqet nga njerëz të cilët e kanë prioritet apo e kanë në fokus vetëm interesat e tyre personale dhe nuk e kanë aspak në fokus zhvillim e mëtutjeshëm të këtij vendi. Po aty ne e vlerësojmë ndihmën e pa kursyshme që e kanë jap për shtetet fqinje Evropiane ndër vite ndaj Kosovës, prandaj kërkojmë dhe ju themi që ne ende kemi nevojë për ta për shkak se ne qeverisemi nga një Qeveri e pa aftë dhe e pa zotë për me i përfaqësu interesat e qytetarëve ashtu si ata e meritojnë. Kjo Qeveri ka bë dëme të mjaftueshme për këtë vend, kanë nënshkruar edhe marrëveshjen e dëmshme siç është demarkacioni pasojat e së cilës do të jenë të përhershme”, tha Hoti.
Kryetarja e të rinjve kërkoi nga faktori ndërkombëtar që të marr masa dhe të ndikojë në përshpejtimin e lirimin e kryetarit të AAK-së Ramush Haradinaj i cili, sipas Hotit dihet botërisht se është duke u mbajtur padrejtësisht në Francë.
Ndërsa kryetari i të rinjve të AAK-së në Fushë Kosovë Ismajl Spahiu tha se marrëveshjet që po i bënë Qeveria janë në dëm të shtetit dhe se nuk kontirbuojnë aspak në zhvillimin ekonomik.
Spahiu: Nuk kemi tokë për të falur
“Gjithashtu bëjmë apel rreth ngritjes së vetëdijes mentale tek qeveria jonë që të bëjnë parandalimin e këtyre lloj marrëveshjeve të dëmshme për Kosovën, me të vërtet ne nuk kemi tokë për të falur dhe si e tillë kjo nuk do të kontribuon aspak në zhvillimin ekonomik, veç se do t’i qasemi një lloj stangimi të gjithmbarshëm të qytetarëve të Kosovës megjithatë e gjitha kjo do të shkon në dëmtimin e Republikës tonë dhe për këtë arsye ne kemi dalë sot”, tha Spahiu.
Kryetarja e të rinjve të AAK-së Hoti gjithashtu tha se do të vazhdojnë të bëjnë aktivitete të tilla pasi që e ardhmja e tyre nuk është e sigurt në duart e këtyre njerëzve dhe nuk do të ndalen deri sa kërkesat tyre të pranohen dhe të merren parasysh.
AAK proteston për lirimin e Haradinajt
Përfaqësues të AAK-së në krye me deputeten Time Kadriaj janë mbledhur para hotelit Swiss Diamond, ku po mbahej Samiti i Komisioneve për Punë të Jashtme të Parlamenteve të Shteteve të Evropës duke kërkuar lirimin e z. Ramush Haradinaj.
Ata kanë mbajtur në duar pankarta me mbishkrime të ndryshme, raporton gazetarja e Bota sot nga tereni.
Në njërën nga mbishkrimet në gjuhën angleze shkruante: “A keni dëgjuar për klanin Pronto?”, “Është i madh, është Qeveria”.
Po ashtu: “Regjim vizash për qeverinë jo për qytetarët”. Ndërsa, brenda po mbahej samiti i Komisioneve për punë të jashtme.
Kjo protestë zgjati rreth një orë, ndërsa u shpërnda e qetë.
Ndryshe, z. Ramush Haradinaj, po mbahet në Francë për shkak të nju fletarrestim të Serbisë. Vendimi për z. Haradinaj, pritet të merret në muajin mars. /BS/