Çështja e themelimit të ushtrisë ka ngjallur shumë debat. Ndikimi që mund të ketë Rusia në Ballkan rrezikon edhe Kosovës, ka thënë eksperti i sigurisë, Fadil Kajtazi.
Përmes një postimi në llogarinë e tij në Facebook, ai ka thënë se Kosova është e rrezikuar nga ndikimi rus, andaj në vend të formimit të ushtrisë, presidenti do të duhej të zgjidhte një personalitet të fortë në krye të AKI-së, përcjell Bota sot.
‘Rezoluta e Kongresit të SHBA se “Shqipëria rrezikohet nga ndikimet ruse” është një sinjal i mirë për të parë rrezikun që mund t’i kanoset edhe Kosovës. Ky rrezik nuk vjen nga një kërcënim ushtarak rus, por nga ndikimi i shërbimeve inteligjente. Presidenti Thaqi ka detyrë kushtetuese ta ruaj vendin nga çdo kërcënim. Në vend të përpjekjeve për ta formuar ushtrinë duke i acaruar marrëdhëniet me miqtë, më e udhës do të kishte qenë që ai të zgjedhë një personalitet të fortë për drejtor të AKI-së dhe t’i propozoj qeverisë trefishimin e buxhetit për AKI’, ka shkruar Kajtazi në Facebook./BS/