Presidenti i vendit, Hashim Thaçi ka bërë publik ekipin e tij. Një vit pasi është zgjedhur president i vendit, tashmë në faqen zyrtare të presidencës figurojnë 12 këshilltaret e presidentit Thaçi.
Në mesin e tyre është edhe ish ministri i Integrimeve Bekim Çollaku, i cili është edhe shef i stafit.
E, zëvendës shef i Stafit dhe këshilltar politik është Abelard Tahiri.
Ky i fundit ditë me parë është zgjedhur edhe anëtar i Kryesisë se Partisë Demokratike të Kosovës.
Në këtë listë si këshilltar politik, figuron edhe emri ish drejtorit të AKI-së, Bashkim Smakaj. Për Smakajn Indeksonline, kishte raportuar kohë me parë se i është bashkuar ekipit të presidentit.
Tutje, si këshilltar politik, Thaçi ka zgjedhur edhe Ismail Sylën dhe ish kandidatin e PDK-së për kryetar të Prishtinës, Astrit Salihu.
Bislim Zyrapi, Ardian Arifaj, Adil Behramaj, Artan Behrami, Astrit Zatriqi, Astrit Ibrahimi, dhe Branislav Nikolic janë këshilltaret tjerë të presidentit Thaçi.
Ndryshe, i pari i vendit kishte paralajmëruar kohë me parë se do të angazhoj edhe ekspert ndërkombëtar si këshilltar, por në faqen zyrtare të presidencës nuk figurojnë këshilltar të huaj.
Thaçi është zgjedhur president i vendit, me votat e deputetëve të partive në pushtet.
Ai ka paralajmëruar se nuk do të jetë me pjesë e ndonjë subjekti politikë. Ndërsa, ka thënë se do të dëshironte edhe një mandat tjetër në krye të presidencës, nëse do të ndryshonte sistemi zgjedhor, ku presidenti i vendit do të zgjidhej me votat e qytetarëve.