(E plotësuar) - Presidenti i Kosovës, Hashim Thaçi, tha se transformimi i Forcës së Armatosur të Kosovës është një domosdoshmëri, njëjtë sikur edhe ruajtja e partneritetit me NATO-n dhe SHBA-në. Në një debat të organizuar nga Lëvizja Fol, ai tha se institucionet e Kosovës janë të përgjegjshme për një gjë të tillë.
“Ky qëllim është krejtësisht i arritshëm duke marrë për bazë faktin se të gjithë partnerët tanë strategjik pajtohen se Kosova duhet ta themelojë ushtrinë. Dallimi i vetëm aktualisht qëndron në qasjen që duhet ndjekur për arritjen e këtij qëllimi të përbashkët”
Presidenti Thaçi tha se partnerët ndërkombëtarë të Kosovës kërkojnë që një gjë e tillë të ndodhë përmes ndryshimeve kushtetuese, prandaj së fundmi kanë rikonfirmuar se do të bëjnë një përpjekje të re në këtë drejtim.
“Tani së fundmi edhe partnerët tanë strategjikë ndërkombëtar, respektivisht SHBA dhe NATO kanë rikonfirmuar gatishmërinë e tyre që të ndihmojnë institucionet tona në një përpjekje tjetër serioze, gjithëpërfshirëse për të siguruar përkrahjen e të gjitha komuniteteve e veçanërisht komunitetit serb në Kosovë për transformimin e FSK në Forca të Armatosura me ndryshime kushtetuese”.
Presidenti Thaçi kishte nxitur reagimet e NATO-s dhe Shteteve të Bashkuara pas paraqitjes së një projektligji për ngritjen e ushtrisë së Kosovës. Aleatët kërkuan që të hiqet dorë nga kjo qasje duke paralajmëruar se në të kundërtën do të ri shqyrtojnë qëndrimin e tyre ndaj Forcës së Sigurisë e cila është ngritur nën mbikëqyrjen e forcave paqeruajtëse të NATO-s.
Gjatë debatit të sotëm presidenti Thaçi tha se është në përgjegjësinë e koalicionit qeverisës që të tregojë përkushtimin për të çuar përpara procesin e ratifikimit të marrëveshjes për shënimin e kufirit me Malin e Zi, që është kusht për liberalizimin e vizave për Kosovën. Ratifikimi i marrëveshjes është penguar nga opozita që vlerëson se ajo e dëmton Kosovën por edhe një pjesë e deputetëve të partive në pushtet.
“Askush nuk mund të justifikohet që opozita s'po voton sepse tek e fundit partnerët e koalicionit i kanë 89 vota apo 90 vota dhe e kanë obligim me kalu dhe duhet të tregojnë zotësinë e përgjegjësinë e tyre, apo definitivisht të sqarohen në raport me opinion publik se çka dhe si po lëvizin tutje sepse është e pajustifikueshme që qytetarët e vendit të mbesin viktimë e disa deputetëve që nuk e votojnë këtë proces që për mu është i saktë i drejtë dhe i pranueshëm”, tha presidenti Thaçi.
Marrëveshja për kufirin me Malin e Zi si dhe ajo e arritur ne bisedimet me Serbinë për krijimin e asociacionit të komunave me shumicë serbe, çuan në një krizë të thellë politike në Kosovë.
Fillimi i vitit shënoi një vale të re tensionesh ndërmjet Kosovës dhe Serbisë të cilat aktualisht kanë pezulluar bisedimet e ndërmjetësuara nga Bashkimi Evropian për normalizimin e marrëdhënieve ndërmjet tyre. Serbia për shkak të zgjedhjeve presidenciale të 2 prillit, ndërsa Parlamenti i Kosovës miratoi rezolutë për pezullimin e bisedimeve deri në lirimin e ish kryeministrit të Kosovës Ramush Haradinaj, që po mbahet në Francë që nga 4 janari në bazë të një urdhër arresti të lëshuar nga Serbia.
Presidenti Thaçi tha të martën se "do të ishte me rëndësi jetike që të vazhdoje zbatimi i marrëveshjeve të arritura mes shtetit të Kosovës dhe Serbisë në Bruksel, ndërsa ne do ta respektojmë rezolutën e Kuvendit të Republikës së Kosovës sa i përket hapave tonë të mëtutjeshëm".
Ai shprehu besimin në mundësinë e pajtimit mes shtetit të Kosovës dhe Serbisë, ndërsa theksoi se njohja e Kosovës nga Serbia është proces i pandalshëm dhe do të ndodhë herët a vonë, "ndërsa se kur ndodh është në autoritetin sovran të Serbisë, por Serbia nuk të mund të integrohet kurrë në BE pa e njohur Kosovën".
Presidenti i Kosovës Hashim Thaçi, në debatin Fol Hapur, të organizuar nga Lëvizja Fol tha se procesi i formimit të ushtrisë së Kosovës është i pandalshëm dhe se askush nuk do të lejohet të përdorë veton, për ta penguar këtë proces.
Megjithëse ka filluar iniciativën për transformimin e ushtrisë përmes Ligjit, Thaçi tha se ende ka kohë që serbët të binden dhe kjo të bëhet përmes ndryshimeve kushtetuese, ashtu edhe siç po kërkojnë partnerët strategjik.
Presidenti i Kosovës tha se iniciativa e cila u mor nga ana e tij për transformimin e FSK-së në ushtri të Kosovës përmes Ligjit, është krejtësisht legjitime dhe kushtetuese dhe se kjo iniciativë, ende mbetet në agjendë.
Thaçi: Askush s’mund të vejë veto për ushtrinë, është proces i pandalshëm
“Unë konsideroj që institucionet tona ende kanë në dispozicion kohën e mjaftueshme, që bashkërisht të bëjnë dhe një përpjekje të fundit, që të sigurojnë përkrahjen e të gjitha komuniteteve për themelimin e forcave të armatosura të Kosovës, përmes ndryshimeve kushtetuese. Sepse unë konsideroj se ky është opsioni më i mirë i mundshëm...Vetëm përpjekjet e mia janë të pamjaftueshme. Prandaj kërkohet nga të gjithë, nga të gjitha institucionet duke përfshirë shoqërinë civile, natyrisht dhe partnerët tanë strategjik të jenë të involvuar, për çka tanimë veç kemi konfirmimin. Tani që kemi risi nga momenti që ka filluar iniciativa ime ligjore për themelimin e Forcave të Armatosura përmes ligjit, sepse komuniteti serb veç është kthyer në parlament dhe Lista ‘Srpska’ është kthyer në Qeverinë e Kosovës. Unë dua të besoj se ky rifillim i përpjekjeve tona, do të jetë produktiv sepse do të jetë i sinqertë, transparent, shumë i hapur për të gjithë...Andaj shpresoj se ky proces do të përmbyllet me përkrahjen dhe pjesëmarrjen direkte të përfaqësuesve të komunitetit serb..... Do të dëshiroja që një qëllim i tillë jetik, i lartë, të marrë mbështetjen e të gjitha komuniteteve të Kosovës dhe të ndodh nëpërmjet ndryshimeve kushtetuese. Në rast të kundërt e kam bërë të qartë, se askush nuk do të mund të përdor veton, për themelimin e ushtrisë së Kosovës. Dhe tashmë kjo është bërë e qartë shumë herë dhe e ritheksoj edhe sot se askush nuk do të mund të vejë veto për themelimin e ushtrisë së Kosovës. Është proces i pandalshëm”, tha Thaçi.
Thaçi nuk ka dashur të komentojë deklaratën e ambasadorit amerikan Greg Delawie, i cili ka thënë se iniciativa e presidentit për themelim të ushtrisë ka qenë e ngutshme. Lidhur me këtë Thaçi tha se edhe ai dhe Delawie kanë të drejtë.
Ndërsa sa i përket zgjedhjes për president të Serbisë, Aleksandër Vuçiq, Thaçi theksoi se Kosova nuk duhet të humbë kohë, për t’u marrë me zhvillimet në Serbi. Ndërsa tha se me rëndësi jetike, është implementimi i marrëveshjeve të arritura mes dy vendeve..
Thaçi: Të mos humbim kohë me zhvillimet në serbi
“Sa i përket zhvillimeve ne Serbi, unë mendoj që opinioni kosovar nuk duhet të humb kohë, sepse ajo është vend fqinj, bën zgjedhjen e vet. Edhe kur ka zgjedh Millosheviqin e ka bërë zgjedhjen e vet. Edhe kur e ka zgjedh Vuçiqin, është zgjedhja dhe vullneti i njerëzve të Serbisë dhe identifikohet me lidershipin e vet sikurse ne që identifikohemi me tonin.... Natyrisht se nga ne mbetet që të punojmë në përpjekje tona për normalizimin e plotë të marrëdhënieve nder shtetërore. Serbia është një nga vendet e rajonit, nuk është ndonjë vend në kuptimin e qendrës rajonal. është një nga fqinjët e republikës së Kosovës. Sa me tepër që Serbia lëviz drejt perspektivës evropiane, është mirë për Kosovën dhe rajonin”, tha Thaçi.
Në këtë debat presidenti ka folur edhe për Demarkacionin Kosovë-mali i Zi, për të cilin beson se do të kalojë dhe se i mbetet Qeverisë së Kosovës ta bëjë këtë dhe të lëvizë përpara.
Thaçi: Besoj që Demarkacioni kalon
“Askush nuk mund të justifikohet që opozita s’po voton. Sepse tek e fundit partnerët e koalicionit i kane 89 apo 90 vota dhe e kanë obligim me e kalu dhe duhet të tregojnë zotësinë dhe përgjegjësinë e tyre apo definitivisht të sqarohen me opinionin publik, se çka dhe si po lëvizin më tutje. Sepse është e pajustifikueshme që qytetarët e vendit të mbesin viktimë e disa deputetëve, që nuk e votojnë këtë proces, që për mua është i saktë i drejtë dhe i pranueshëm dhe prej ekspertëve vendor dhe prej atyre ndërkombëtar. Pra duhet të bëhet dhe Asociacioni i Komunave me shumicë serbe, që nuk është produkt vetëm i Brukselit por dhe dokumentit të Ahtisarit. Pastaj në procesin e Vjenës dhe tash është realitet dhe kjo është plotësisht në përputhshmëri me Kushtetutën dhe ligjet e Kosovës. Qeveria duhet të lëviz shpejt në themelimin e këtij Asociacioni”, tha presidenti.
Thaçi në këtë debat është pyetur edhe rreth ndalimit të kreut të AAK-së Ramush Haradinaj tash e sa kohë në Francë, me akuzat për krime lufte, për të cilin beson se ai do të lirohet së shpejti, duke theksuar se kësaj radhe Franca është viktimë e akuzave të shpifura nga Beogradi.
Thaçi: Besoj në lirimin e shpejtë të Haradinajt
“Sa i përket zotit Haradinaj, ai mbahet padrejtësisht në Francë, me aktakuza te kohës së Sllobodan Millosheviqit, për fat të keq të fuqizuara prej qeverive të pas Millosheviqit, por që janë të njëjta. Unë besoj plotësisht në lirimin e tij shpejtë dhe ai t’i kthehet jetës dhe familjes dhe jetës politike. Ato akuza janë të rrejshme, te paqëndrueshme. Unë kam besim te plote që drejtësia franceze do te marre vendimin e merituar”, tha ai.
I pyetur për mundësinë e zgjedhjeve të parakohshme, pasi që koalicioni po tregohet i pafuqishëm për t’i shtyrë proceset përpara, ai tha se do ta respektojë mandatin kushtetues dhe ligjor të institucioneve. Ndërsa theksoi se nuk është fundi i botës edhe po të shkohet në zgjedhje, në rast se partitë e koalicionit merren vesh për këtë.
Thaçi: Nuk është fundi i botës me shku në zgjedhje
“Do ta respektoj mandatin kushtetues dhe ligjor të institucioneve. Ndërsa nëse ka vullnet të spektrit politik, jam një prej atyre kryeministrave që dy herë kam shkuar në zgjedhje të parakohshme, në atë moment që e kam parë që është në interes për vendin dhe të ketë institucione më efektive. Kështu që nuk është fundi i botës dhe me shku në zgjedhje të parakohshme, por për gjithçka duhet të ketë marrëveshje të spektrit politik. Marrëveshjet e spektrit politik unë nuk jam ai që i refuzoj. Përkundrazi respektoj dhe do ta vlerësoj. Por përsëri unë jam president i të gjithëve, nuk marrë anë as këndej as andej. Merret vesh spektri politik le të shkojnë në zgjedhje. Nuk merren vesh le të vazhdojnë. Por se a ka nevojë Kosova për efektivitet më të madh, jam i bindur se ka”, tha Thaçi.
Presidenti përsëriti se Kosova po bën hapat e nevojshëm dhe përgatitjet procedurale, për ta paditur Serbinë për gjenocid.
Thaçi: Po përgatitemi ta akuzojmë Serbinë për gjenocidin e kryer në Kosovë
“Është aspekt procedural të cilin ne duhet ta respektojmë. Duhet t’i bëjmë dhe disa hapa tjerë që janë të nevojshëm në rrafshin e diplomacisë. Gjithashtu duhet të bëjmë dhe disa hapa të tjerë në rrafshin për të siguruar qasjen e në të njëjtën kohë bazamentin e pa kontestuar legal për të drejtën tonë për akuzë për gjenocid të Serbisë në Kosove. Ndërsa se a ka kryer Serbia gjenocid në Kosove apo jo, e dine tërë bota. Aktualisht jemi në procesin e përgatitjeve procedurale të bazës legale që të mos kontestohemi nga askush, në këtë të drejtë tonë“, tha presidenti i vendit.
Në këtë debat presidenti është pyetur edhe nëse dialogu Kosovë-Serbi, do të kalojë në nivel presidentësh, e për të cilin tha se kjo varet nga Bashkimi Evropian.
