Eksperti i sigurisë Avni Islami, ka komentuar ngjarjet e fundit në Maqedoni. Duke folur në një prononcim për gazetën “Bota sot”, Islami ka thënë se tensionet dhe dhuna e fundit në Maqedoni, nuk i kontribuojnë askujt, madje as maqedonasve.
Ai ka thënë se ata të cilët e dhunojnë tempullin e demokracisë, janë huliganë të porositur nga qarqe të caktuara për destabilizimin e Maqedonisë.
Ndërsa, shqiptarët, eksperti i sigurisë i ka porositur që të mos bien pre e provokimeve.
“Kjo çka u pa mbrëmë, është e papranueshme dhe e turpshme për një vend, i cili pretendon të jetë pjesë e familjes evropiane. Shqiptarët duhet të kenë kujdes e të mos bien pre e provokimeve të ndryshme dhe situata politike të mos shndërrohet në konflik ndëretnik”, është shprehur Islami, derisa ka theksuar se përgjakja e Zaevit dhe Ziadin Selës dhe tërheqja zvarrë e Sheqerinskes në Kuvend, tregon brutalitetin e atyre që po e kundërshtojnë demokracië”.
Por, ai është shprehur optimist se situata e tillë do të kalojë së shpejti./BS
