Procesi i numërimit të votave me kusht ka filluar sot gjatë ditës, kurse përfundimi i numërimit të këtyre votave pritet të bëhet deri nesër.
Të paktën kështu ka deklaruar për media, koordinatori i Qendrës së Numërimit dhe Rezultateve, Burim Ahmetaj.
Ai ka thënë se deri më tani janë përfunduar apo janë në proces të numërimit 21 komuna nga i gjithë vendi.
“ Procesi është duke vazhduar. Tash janë duke u numëruar votat me kusht të komunës së Prizrenit dhe Skënderajt që faktikisht kemi filluar prej komunës së parë, që deri më tani 21 komuna janë në përfundim apo proces e sipër”, ka bërë të ditur Ahmetaj..
Ai tha se numërimi do të vazhdojë deri në orët e vona, duke shtuar se nesër pritet përfundimi i këtij procesi.
“Diku 65-70% janë numëruar të votave me kusht. Mirëpo do të punojmë deri në orët e vona të natës, dhe do të vazhdojmë që nesër do të kompletohet edhe ky proces”, ka thënë Burim Ahmetaj.
Rezultatet përfundimtare të KQZ-së pritet të publikohen gjatë kësaj jave, ku më pas do t’i lihet radha krijimi të Qeverisë, për të cilën koalicioni fitues PAN është i bindur se i ka votat.