Deputeti i zgjedhur nga Lëvizja Vetëvendosje, Frashër Krasniqi, ka thënë se është përgëzuar nga disa ushtarë të UÇK-së për kritikat që ai ua ka bërë disa komandantëve të UÇK-së, të cilët sipas Krasniqit, kanë abuzuar me shtetin e Kosovës.
Krasniqi ka thënë sot në Televizionin Dukagjini se Kadri Veseli ka qëndruar në luftë për vetëm një javë ditë.
“Unë i kam marrë me dhjetëra mesazhe prej ushtarëve dhe invalidëve, që mund të ua lexojë. Ata më kanë thënë ‘hallal të qoftë që e përmende këtë fakt’. Kadri Veseli nuk e di nëse e ka pasë vetëm një javë pjesëmarrje në luftë; nuk e di unë saktë, por po flas atë që thonë shokët e tij, këta madje kanë ndejtë në Shqipëri”, ka thënë Krasniqi.
Krasniqi ka kritikuar AAK-në dhe PDK-në se po u bien në gjunjë zyrtarëve të Listës Serbe.
“Sot janë duke i ra në gjunjë Listës Serbe, të cilët vetë Pal Leka i kishte quajtur ‘pinjoll të Vuçiqit e Nikoliçit'”, ka thënë deputeti Krasniqi.
Ai ka thënë se “disa nga komandantët e vërtetë të UÇK-së sot jetojnë në kushte të mjerueshme.”
