Vendimi i parë i Ramush Haradinajt si kryeministër në mbledhjen e Qeverisë ishte shkarkimi i komisionit për Demarkacionin me Malin e Zi që udhëhiqej nga Murat Meha, ndërsa një tjetër vendim rreth kësaj çështje pritet të merret në mbledhjen e ardhshme të qeverisë.
Kryeministri Haradinaj pritet që nesër të tregojë publikisht emrat e anëtarëve të komisionit të ri për Demarkacionin, të cilët do të udhëhiqen nga profesori, Shpejtim Bulliqi.
Halil Matoshi, nga zyra për media e kryeministrit, ka thënë për mediat vendore se sipas të gjitha gjasave emërimi i anëtarëve do të bëhet nesër gjatë mbledhjes së qeverisë, porse kjo s’është krejtësisht e sigurt pasi ende nuk është caktuar rendi i ditës për mbledhjen e ardhshme.
Emrat e përfolur nga mediat për të qenë pjesë e komisionit të ri janë, Florim Isufi, Zejnullah Gruda e disa të tjerë.
