Ministria e Punëve të Brendshme përmes një komunikate për media ka njoftuar se ministri Flamur Sefaj ka pritur në takim ambasadorin jorezident të Belgjikës në Kosovë, Françoios Bontemps dhe përfaqësuesin e zyrës belge në Kosovë, Jean-Louis Servais.
Në këtë takim ministri Sefaj e njoftoi ambasadorin belg për situatën e përgjithshme të sigurisë në Republikën e Kosovës dhe përpjekjet që po bëjnë institucionet e zbatimit të ligjit në luftimin e krimit të organizuar dhe korrupsionit.
Theks i veçantë në këtë takim i vu bashkëpunimit policor në mes dy vendeve sa i përket luftimit të terrorizmit dhe masat të cilat kanë marrë ty dy shtetet dhe për bashkëpunimet në projekte konkrete mes dy policive.
Sefaj falënderoi shtetin belg për mbështetjen që ka dhënë në shumë fusha në Kosovë, ndërsa në veçanti sa i përket sektorit të sigurisë në forcimin e rendit dhe ligjit.
Ambasadori Françoios Bontemps, theksoi se shteti Belg do të vazhdojë të jetë partner i Republikës së Kosovës në avancimin e mëtejmë të demokracisë dhe në angazhimin konkret për forcimin e institucioneve të sigurisë dhe ritheksoi gatishmërinë e shtetit të tij për forcimin e këtij bashkëpunimit mes dy policive.
