Në Universitetin Amerikan në Kosovë(AUK), gjatë ditë së sotme zyrtarë të KQZ kanë organizuar planin e simulimit të procesit të zgjedhjeve me qëllim të informimit dhe të edukimit të votuesve të rinj.
Presidentja e AUK-ut, Sharon Hart tha se një ndër gjërat e bukura për të jetuar në shumë vende është e drejta e votës.
Ajo studentëve të pranishëm iu tha se ju përmes votës mund të shikojnë se çfarë mund të kontribuojnë për Kosovën.
Hart: Shumica prej jush do kontribuoni për zgjedhjet
“Njëra ndër bukuritë e të jetuarit në shumë vende është mundësia për të votuar. Dhe besoj së shumica prej jush keni moshën e duhur pra mosha 18 vjeçare e sipër dhe keni mundësinë të shikoni se çfarë mund të bëni që të kontribuoni në këtë rast për Kosovën dhe për zgjedhjet që do të mbahen në këtë vend”, tha ajo.
Ndërkaq kryetarja e Komisionit Qendror Zgjedhor, Valdete Daka, porositi studentët që të votojnë pasi që është e drejtë e tyre të zgjedhin atë që duhet ta udhëheqë komunën e tyre.
Daka: Vota juaj vendos për fatin tuaj
“Do të keni mundësi të shihni se si një simulim se si bëhet votimi se si duhet ta zgjidhni ata që mendoni që është më i miri, është kënaqësi pra që jam këtu...Pra ju të gjithë i keni mbushur 18 vjet dhe e keni këtë të drejtë shfrytëzojeni këtë të drejtë sepse është e drejtë e cila është e garantuar me kushtetutë dhe iu mundëson që ju të vendosni për fatin juaj dhe që ju ta keni atë të drejtë që të vendosni se kush do të udhëheqë me komunën e juaj”, tha ajo.
Zyrtari i KQZ-së, Islam Demolli ka thënë se ky simulim është iniciuar pas numrit të madh të votave të pavlefshme që kanë dalë pas zgjedhjeve të 11 qershorit.
Ai tha se me qëllim që të ketë sa më pak fletëvotime të pa vlefshme KQZ ka organizuar simulim të procesit zgjedhor i cili iu dedikohet votuesve të rinj.
Demolli: Ky simulim mëson hapat e procesit zgjedhor
“Komisioni i zgjedhjeve pas zgjedhjeve të 11 qershorit për shkak të numrit të madh të fletëvotimeve që kanë qenë të pavlefshme në kuadër të informimit dhe të edukimit votues e ka paraparë që në disa qendra të mbahet një simulim i procesit zgjedhor kryesisht të iu dedikohet votuesve të rinj për t'i mësuar ata me hapa e procesit zgjedhor në mënyrë që të kemi sa me pak fletëvotime të pa vlefshme", tha Demolli.
Ndryshe, simulimi i procesit zgjedhor është organizuar në pesë fakultete publike dhe dy private në Kosovë.
