Që nga fillimi i diskutimi të dialogut ndërmjet Kosovës dhe Serbisë, vendi ynë ka qenë i vetmi që ka realizuar këto marrëveshje të nënshkruara në Bruksel. Kryeministri i Kosovës, Ramush Haradinaj ka kërkuar që Shtetet e Bashkuara të Amerikës të përfshihen në dialogun e Kosovës me Serbinë. Duke folur në lidhje me këtë, analisti politik, Gurakuçi Kuçi ka thënë se në këtë dialog e vetmja humbëse është Kosova, pasi që Serbia po luan me dy karta.
“Kosova në dialogun e saj me Serbinë, po shihet që pothuajse është humbëse në çdo sferë, dhe Bashkimi Evropian një garantues jo i drejtë i zbatimit të marrëveshjeve ndërmjet të dyja vendeve. BE-ja, poashtu me diplomacinë e saj realiste e shfrytëzoi injorancën diplomatike të Kosovës, për të tentuar ta kthejë Serbinë me orientim Perëndimor, përderisa Serbia luan me dy karta”, ka thënë ai.
Ai ka thënë se SHBA-ja po tenton që të ndalë procesin e keq.
“Kosova ka mbetur pre e ekuilibrave të BE-së dhe Rusisë, duke iu shtuar kritere çdo ditë për çdo gjë vetëm për hatër të ekuilibrave dhe Serbia po del përfituese kryesore, SHBA-ja në anën tjetër tani tenton ta ndalë këtë proces të keq”, është shprehur ai.