(E plotësuar) - Presidenti i Republikës së Kosovës, z. Hashim Thaçi, ka pritur sot në takim zëvendës ndihmës Sekretarin e Shtetit, përgjegjës për çështjet evropiane dhe euroazi, z. Hoyt Brian Yee.
Presidenti Thaçi dhe zëvendës ndihmës Sekretari Yee kanë biseduar për marrëdhëniet bilaterale, rolin e SHBA-së në rajon, perspektivën euroatlantike të Kosovës, dialogun me Serbinë dhe çështje të tjera me interes të përbashkët.
Me këtë rast, presidenti Thaçi ka thënë se vazhdimi i mbështetjes së SHBA-së për Kosovën dhe rajonin, mbetet çelës për paqe e stabilitet të qëndrueshëm.
“Jemi mirënjohës për përkrahjen e vazhdueshme të SHBA-së në të gjithë sektorët e jetës në Kosovë”, ka shtuar presidenti.
Presidenti ka njoftuar zëvendës ndihmës Sekretarin Yee për sukseset më të fundit të Kosovës, zgjedhjet komunale dhe betimin e gjyqtarëve dhe prokurorëve nga komuniteti jo shumicë.
“Zgjedhjet komunale janë një dëshmi tjetër e pjekurisë politike të Kosovës, ndërsa dekretimi i gjyqtarëve dhe prokurorëve është një hap i madh drejt forcimit të sistemit të drejtësisë dhe konsolidimit të integritetit shtetëror të Kosovës”, u shpreh presidenti Thaçi.
Duke folur për prioritetet e Kosovës, presidenti Thaçi u shpreh se përmbyllja e procesit të liberalizimit të vizave, përmbyllja e dialogut me Serbinë dhe transformimi i FSK-së mbesin prioritete konkrete, pa lënë anash prioritetet e përhershme që janë ekonomia dhe forcimi i sundimit të ligjit.
Nga ana tjetër, zëvendës ndihmës Sekretari i Shtetit, përgjegjës për çështjet evropiane dhe euroazi, Hoyt Brian Yee, ka thënë se SHBA-ja do të vazhdojë mbështetjen e gjithmbarshme për Kosovën.
“Perspektiva evropiane për Kosovën, si dhe për tërë rajonin, janë prioritete të SHBA-së”, u shpreh Yee.
Në këtë takim është biseduar edhe për luftën kundër terrorizmit dhe ekstremizmit, ku u vlerësua se Kosova është lider në rajon në luftimin e terrorizmit.
***
Ka nisur takimi mes presidentit të Kosovës, Hashim Thaçi dhe Zëvendës ndihmës sekretarit amerikan të Shtetit për çështje evropian dhe euroaziatike, Hoyt Brian Yee.
Ende nuk dihet se cilat do të jenë temat që do të diskutohen pasi nuk ka pasur deklarime në fillim të takimit.
Yee, gjatë ditës do të takohet edhe me krerët e tjerë të shtetit, kryetarin e Kuvendit Kadri Veselin dhe kryeministrin Ramush Haradinaj.
Kujtomë, se Yee dje qëndroi në Serbi, i cili u takua me krerët e shtetit serb dhe u bisedua edhe për dialogun Kosovë-Serbi.
