Gjykata e Apelit e Kosovës, e ka lënë në fuqi pjesshëm aktvendimin e Gjykatës Themelore në Prishtinë të datës 11 korrik e me këtë rrjedhimisht edhe aktakuzën e Prokurorisë Speciale të 30 majit të vitit të kaluar kundër të pandehurit S.M., dhe tre të pandehurve tjerë.
Kolegji profesional prej tre gjyqtaresh i kësaj gjykate, duke vendosur sipas ankesave të palëve, e ka lënë në fuqi pikën I të aktakuzës sipas të cilës S.M. dyshohet për veprën penale “Keqpërdorim i detyrës apo autoritetit zyrtar” nga neni 422 i Kodit Penal të Republikës së Kosovës, ndërsa V.G., M.S., dhe A.S. për “ Dhënie të ryshfetit” nga neni 429 lidhur me nenin 28 të te njëjtit ligj.
I njëjti kolegj, e ka ndryshuar pjesën e aktvendimit e cila ka të bëjë me pikën IV, të aktakuzës e cila po ashtu e ngarkonte të pandehurin S.M. më veprën penale” Keqpërdorim i detyrës apo autoritetit zyrtar”, pasi që se si person zyrtar, duke shfrytëzuar detyrën dhe autoritetin e tij, më qellim të përfitimit të kundërligjshëm të dobisë pasurore, për vete ose personin tjetër, përkatësisht të afërmin e tij A.M., gjatë vitit 2015, ishte takuar më personat e dëmtuar Z.G. dhe P.G., më qëllim që të nxjerrë borxhin më vlerë prej 200 mijë eurosh, me pretendimin se P.G., i ka borxh të afërmit të tij A.M. Në këtë pikë aktakuza është hudhur dhe procedura penale është pushuar, pasi që nuk ka prova të mjaftueshme të cilat e mbështesin dyshimin e bazuar mirë se ai e ka kryer këtë vepër penale.
Kolegji ka vlerësuar se sa i përket pikës IV të aktakuzës, nuk ekziston asnjë element inkriminues në veprimet e të pandehurit S.M.. Kjo për faktin se qëllimi i tij ka qenë zgjidhje e problemit në mes dy familjeve, për më tepër i pandehuri, siç rezulton nga shkresat e lëndës, nuk ka vepruar si person zyrtar, aq më tepër të ketë përfituar ndonjë dobi pasurore, për vete ose dike tjetër, ose t’i ketë shkaktuar dikujt dëme.
