(E plotësuar)- Presidenti i Kosovës, Hashim Thaçi ka dekoruar qytetarët e Kukësit me “Urdhrin e Lirisë”, si shenjë falënderimi për strehimin që ata bënë për qytetarët e Kosovës gjatë luftës së fundit në vendin tonë.
Presidenti Thaçi gjatë ceremonisë zyrtare në Kukës, tha ky qytet ka qenë epiqendra e pavarësisë së Shqipërisë dhe Kosovës, ndërsa, kuksjanët kanë qenë afër qytetarëve të Kosovës në momentet më të rëndësishme për vendin.
Thaçi: Kukësi u bë i madh dhe bujar
"Jam këtu për të shprehur falënderimin e madh për qytetarët e Kukësit, të cilët me zemërgjerësi dhe bujari të pakrahasueshme strehuan rreth 500 mijë vëllezër dhe motra të tyre nga Kosova, të shpërngulur dhunshëm në vitet e luftës 1998-1999. Në periudhën më kritike të shqiptarëve të Kosovës në fund shekullin e njëzetë, Kukësi i ri, Kukësi i vogël në dukje, u bë Kukësi i madh, i hapur, i dashur dhe thellësisht bujar dhe fisnik....Ne në Kukës zunë vend rreth gjysmë milioni qytetarë të dëbuar. Falë solidaritetit, dashurisë dhe ndjenjës së pastër atdhetare, kosovarët e dëbuar në Kukësin tuaj gjetën ngrohtësinë e vatrës shqiptare dhe me durim pritën përfundimin e luftës", tha ai.
Ai shtoi se kontribut gjatë luftës së fundit ka dhënë e gjithë Shqipëria, pa të cilën nuk do të kishte as liri dhe as pavarësi të Kosovës.
Thaçi: Asnjëherë në histori nuk kanë qenë më të mira marrëdhëniet tona
"Sot historia e marrëdhënieve midis Kosovës dhe Shqipërisë ka ndërruar rrënjësisht për të mirë. Asnjëherë në histori nuk kanë qenë më të mira marrëdhëniet tona politike, ekonomike kulturore dhe të të gjitha fushave të jetës. Shqipëria demokratike është shtet anëtar i NATO-s. Kosova e lirë dhe e pavarur është në rrugë të sigurt drejt integrimeve euroatlantike. Pavarësisht se jemi një komb në dy shtete, ne nuk kemi alternativë tjetër përpos integrimeve euroatlantike", tha ai.
Thaçi u ndal edhe Ushtria Çlirimtare e Kosovës, duke thënë se pas një historie të gjatë të përpjekjeve për liri, Kosova më në fund kishte organizatën më të rëndësishme politike dhe ushtarakë, Ushtrinë Çlirimtare të Kosovës, guerilen më të suksesshme të shekullit për të jetësuar ëndrrën e lirisë, ndërsa Kukësi ishte bërë bazë e fuqishme e UÇK.
Kurse, kryetari i Bashkisë së Kukësit, Bashkim Shehu tha se Kukësi nderohet për shkak të vlerave që tregoi në pranverën dramatike të vitit 1999, të cilat kanë të bëjnë me humanizmin ndaj qytetarëve të Kosovës.
Shehu: Kosova di të nderojë
“Nderi më i lart i vjen Kukësit sot nga Kosova. Mirënjohja vjen pikërisht nga vendi që përjetoi ato ngjarje dramatike. Kjo është me rëndësi të veçantë, Kosova di të nderojë, Kosova nuk harron të kaluarën e vet, Kosova nuk harron Kukësin dhe kuksjanët, prandaj kjo është dritë e re komunikimi, bashkëpunimi real, “, tha ai.
Ai tha se një ditë e tillë le të shpallet si ditë kombëtare e urbanizmit, ku kujtesa kolektive të jetë më prezentë dhe të kujtohen ato ditë të vështira, ku qytetarët e Kukësit dhe Kosovës vuajtën.
Presidenti Thaçi ndan “Urdhrin e Lirisë” për qytetarët e Kukësit
Presidenti i Kosovës Hashim Thaçi ka dekoruar Qytetarët e Kukësit me Urdhrin e Lirisë, si shenjë falënderimi për strehimin që ata bënë për qytetarët kosovarë gjatë luftës së fundit në Kosovë.
Ai me këtë rast tha se falë solidaritetit dhe ndjenjës së pastër atdhetare, në Kukës dhe në mbarë Shqipërinë, kosovarët e dëbuar gjetën ngrohtësinë e vatrës shqiptare.
“Falë solidaritetit dhe ndjenjës së pastër atdhetare, në Kukës dhe në mbarë Shqipërinë, kosovarët e dëbuar gjetën ngrohtësinë e vatrës shqiptare. Për qytetarët e Kukësit sot do të ndajë medaljen ‘Urdhri i Lirisë”, tha Thaçi.
Për më tepër ai theksoi se historia e marrëdhënieve midis Kosovës dhe Shqipërisë ka ndërruar rrënjësisht për të mirë.
“Pavarësisht se jemi një komb në dy shtete, ne nuk kemi alternativë tjetër përpos integrimeve euroatlantike", tha ai.
Ndërsa kryetari i bashkisë sa Kukësit Bashkim Shehu tha se sot është një ditë e shënuar për gjithë banorët e Kukësit.
“Kukësi nderohet për vlerat e larta dhe humanizmin ndaj vëllezërve të Kosovës. Kukësi me gjithë rajonin hapen dyert dhe zemrat në formë të natyrshme për vëllezërit e tyre. Sot në mesin tonë është i nderuari presidenti Thaçi. Në atë kohë vinte si luftëtar i UÇK-së, sot vjen të na nderojë si president i Kosovës së lirë e të pavarur. Kosova di të nderoj. Kosova nuk harron të kaluarën e vet. Kosova nuk e harron Kukësin dhe kuksianët. Nderimi i sotëm është shenjë kujtese për vitin 1999. Një ditë e tillë le të shpallet si ditë kombëtare e humanizmit”, është shprehur ai.
Ceremonia e ndarjes së medaljes "Urdhri i Lirisë" për qytetarët e Kukësit(Drejtpërdrejt)
Presidenti i Kosovës Hashim Thaçi sot do të qëndrojë në qytetin e Kukësit ku për qytetarët e këtij qyteti do të ndajë medaljen “Urdhri i Lirisë”.
