Kryetari i Lidhjes Demokratike të Kosovës Isa Mustafa, ka komentuar hapjen e fushatës, për balotazhin që do të mbahet më 19 nëntor.
Mustafa në një postim në Facebook, ka thënë se partia e tij ofron projekt për bashkëqeverisje, i cili sipas tij tejkalon ngjyrat politike, përcjell Bota sot.
Postimi i plotë i Mustafës:
Të nderuar miq, qytetarë të Kosovës,
Sot po hyjmë në fazën e fundit të garës për të zgjedhur kryetarët e komunave.
Fazën e parë e përfunduam me sukses. Me 19 nëntor kemi shansin dhe detyrimin që procesin demokratik të filluar me 22 tetor, ta ruajmë dhe forcojmë në mënyrë që vota qytetare të prodhoj qeverisjen e vullnetit popullor.
Fushata që do zhvillojmë këto ditë dhe vota që do kërkojmë për kandidatët tanë, për ne si Lidhje Demokratike e Kosovës, do të jetë fushatë dhe zotim i sinqertë që iu drejtohet të gjithë qytetarëve.
Ne ofrojmë një projekt të përbashkët bashkëqeverisjeje, i cili kalon ngjyrat politike, ideologjike apo çfarëdo dallimi tjetër.
Qytetet tona, lagjet ku jetojmë, për të ndryshuar kërkojnë vullnetin, idetë dhe përpjekjen e secilit.
Ne jemi në gjendje që t`i tejkalojmë dallimet dhe t`i japim shansin secilit që të jetë pjesë e zhvillimit.
Ne dëshirojmë ta tejkalojmë ndarjen prandaj do kërkojmë që të gjithë të Lidhemi rreth një projekti perspektiv për fëmijët tanë.
Projekti ynë është i hapur për të gjithë.
Ne jemi gati. Na shkoftë mbarë të gjithëve!/BS
