Kryeministri i Kosovës, Ramush Haradinaj, ka mbërritur në Bruksel, në pasditen e së enjtes, ku do të takohet me udhëheqës të Bashkimit Evropian.
Shefi i ekzekutivit kosovar i ka kaluar pa ndonjë telash kufijtë, ndryshe nga siç paralajmërohej nga mediat ndërkombëtare.
Ditë më parë, Reuters shkroi se Haradinaj mund të arrestohet gjatë udhëtimeve jashtë vendit, edhe pse mban postin e shefit të ekzekutivit, nëse Serbia nuk e tërheq fletarrestin kundër tij që e ka dërguar në Interpol.
Shefi i Kabinetit të Kryeministrit, Avni Arifi, ka publikuar një fotografi nga Belgjika, në llogarinë e tij në Facebook, nëpërmjet së cilës ka konfirmuar arritjen e Haradinajt në Bruksel.
“Shteti i Kosovës do të jetë shtet i BE-së. Ky proces është i pandalshëm sado i vonuar”, ka shkruar Arifi në legjendën e fotografisë së publikuar në rrjetin social në pasditen e së enjtes.
Në mbrëmjen e së mërkurës, zëdhënësi i Qeverisë, Arbër Vllahiu, ka treguar agjendën e Kryeministrit të Kosovës, gjatë qëndrimit në Bruksel.
Ai ka thënë se në takimet e Haradinajt në Bruksel do të diskutohet kryesisht për zbatimin e Marrëveshjes së Stabilizim Asocimit (MSA).
I pyetur se a do të diskutohet edhe për çështjen e demarkacionit, gjatë takimeve që Haradinaj do të zhvillojë në Bruksel, Vllahiu ka thënë se ajo nuk është në agjendën e kryeministrit.
“Çështja e demarkacionit nuk është pjesë e agjendës, përveç faktit që çështja e demarkacionit mund të diskutohet brenda takimeve bilaterale që do të zhvillohen gjatë ditës së premte me kryeministrin dhe zyrtarët e lartë evropian të BE-së”, ka thënë Vllahiu në RTV21.
