Kreu i qeverisë Ramush Haradinaj ka sqaruar edhe lajmet e djeshme se konferenca e paraparë të mbahej bashkë me shefen e diplomacisë së BE-së, Federica Mogherini, ka ndodhur si pasojë e lëshimit të takimit nga kjo e fundit, meqë ishte revoltuar me Haradinajn, pasi kishte kërkuar rol kyç të SHBA-ve në dialog.
Haradinaj tha se arsyeja e mos mbajtjes së konferencës ka qenë zgjatja e takimeve, të cilat morën kohën e paraparë edhe për konferencë. Derisa, në të gjitha takimet, Haradinaj shtoi se ua ka bërë me dije zyrtarëve evropianë që SHBA duhet të ketë rol të rëndësishëm në procesin e dialogut.
Haradinaj: U vonuam në takime, s’patëm kohë për konferencë
“Ne në fund kemi lëshuar një deklaratë të përbashkët, të dakorduar, por nuk kemi pasur konferencë për shtyp. Arsyeja pse u vonuam në këto takime dhe disa prej temave u diskutuan në mënyrë përmbajtësore dhe morën me shumë kohë. Bindja ime dhe e Kosovës është se Kosova ka humbur shumë kohë në përmbylljen e çështjeve të hapura për Kosovën. Do të thotë fakti se kosovarët e lindur në vitin 1999 kanë votuar, ndërsa Kosova ende nuk është e definuar, e përmbyllur. Këto kanë qenë ato pikëpamjet e mia të vazhdueshme edhe kërkesa ime që dialogu të jetë BE-SHBA, që edhe roli i SHBA-s të jetë i rëndësishëm në këtë proces”, tha Haradinaj.
Shefi i ekzekutivit u shpreh se Kosova nuk mundet më të përshtatet pa kufij, pasi është shtet i pavarur, sovran dhe vetëm si të tillë do ta prezantojnë dhe përfaqësojnë.
Haradinaj u pyet edhe për deklaratat e ish-shefit të gjyqtarëve të EULEX-it, Malcolm Simmons, se brenda këtij misioni ka korrupsion.
Haradinaj: E habitshme mos deklarimi i hershëm i këtyre çështjeve
“Janë të dëmshme për cilëndo organizatë kur një pjesëtar i saj flet për situata të tillë në organizatë. Ajo që më habit mua është kur një gjyqtar parimor, nuk e thotë në kohë kur ndodh shkelja por e thotë pasi kanë kaluar gjitha ato kohëra, është disi e habitshme dhe e zbeh krejtësisht këtë situatë”, u shpreh ai.
Kryeministri Haradinaj theksoi se Kosova është serioze në perspektivën e saj evropiane dhe roli i SHBA-ve në çështjet e pambyllura është i pazëvendësueshëm.