Ministri i Drejtësisë, Abelard Tahiri, ka pritur sot në takim ambasadoren e Finlandës në Kosovë, Anne Huhtamaki, me të cilën biseduan lidhur me prioritetet e ministrisë, reformat legjislative dhe përmbushjen e agjendës së reformave evropiane.
Gjatë takimit, ministri Tahiri vlerësoi lart rolin pozitiv që shteti finlandez ka pasur në Kosovë, veçanërisht në mbështetjen e tyre për avancimin e Shërbimit Korrektues të Kosovës.
Ambasadorja Huhtamaki, përgëzoi ministrin Tahiri për progresin e arritur në vend, sidomos për hapat e ndërmarrë në sistemin e drejtësisë, në veçanti rishikimin e Legjislacionit Penal dhe Civil.
Diplomatja finlandeze po ashtu shprehu mbështetjen e mëtejshme të Finlandës për proceset integruese evropiane të Republikës së Kosovës.