Seanca e gjykimit të mjekëve të “Medicusit” u shty, ngase Lutfi Dervishi nuk u dërgua në gjykatë nga qendra e paraburgimit.
Për shkak të një keqkuptimi mes gjykatës dhe Qendrës së Paraburgimit në Dyz është shtyrë gjykimi i Lutfi Dervishit dhe Sokol Hajdinit.
Lutfi Dervishi nuk u soll në gjykatë nga kjo qendër.
Kryetarja e trupit gjykues Franceska Fischer tregoi se qendra e paraburgimit nuk e kishte kërkesën që sot ta dërgojë Dervishin në gjykatë.
“Njëri nga të pandehurit Lutfi Dervishi nuk ka arritur nga qendra e paraburgimit, zyrtarja ime ligjore ka qenë në kontakt me Qendrën e Paraburgimit dhe si duket ka ndodhur një keqkuptim. Qendra e paraburgimit nuk e ka kërkesën që urdhërohet që të pandehurin ta sjellë sot në gjykatë”, tha gjyqtarja Fischer.
Pasi që prokurorja e çështjes Valeria Bolici në seancat e kaluara kishte kërkuar që të bëhej një ekspertizë shtesë, atëherë kryetarja e trupit gjykues kërkoi nga prokurorja që t’ia paraqesë gjykatës këtë parashtresë si dhe më pas kërkoi nga dëshmitari-ekspert Milazim Tahirukaj që ta hartojë një raport dhe në seancën e radhës kur do të thirret si dëshmitar ta prezantojë atë.
Seanca e radhës do të mbahet me datën 29 nëntor, ndërsa në të pritet të dëshmojë Islam Bytyqi.
Në këtë proces gjyqësor, Lutfi Dervishi që ishte pronar i Klinikës “Medicus” në të cilën u krye transplantim i veshkave, akuzohet për trafikim me qenie njerëzore dhe krim të organizuar, ndërsa Sokol Hajdini për lëndim të rëndë trupor.
Pjesë e këtij gjykimi ishte edhe Arban Dervishi, djali i Lutfi Dervishit, por procedura ndaj tij është veçuar, ngase ai ndodhet në arrati.
Urologu Lutfi Dervishi ishte dënuar nga Gjykata Themelore në Prishtinë me 8 vjet burg në vitin 2013, ndërsa Sokol Hajdini me 3 vjet.
Gjykata e Apelit më pas ia kishte vërtetuar dënimin Dervishit, ndërsa Hajdinit ia kishte shtuar vitet e dënimit me burg nga 3 vjet në 5, raporton kallxo.
Pastaj Gjykata Supreme e riktheu përsëri në rigjykim Rastin “Medicus”, ndërsa Lutfi Dervishi që ndodhej në arrati, u arrestua disa ditë pas vendimit të supremes për rigjykim.
