Lëvizja Vetëvendosje është grupi më i madh parlamentar, me 32 deputetë.
Deputetja e këtij subjekti, Albulena Haxhiu, ka thënë se ata e kanë bërë të ditur qysh në shtatorin e vitit 2016 se cila do të ishte zgjidhja sa i përket marrëveshjes aktuale të demarkacionit, shkruan sot Koha Ditore.
“Së pari është dashur që kryeministri Haradinaj të tërhiqet nga marrëveshja aktuale, dhe pastaj do të mundë të angazhonim ekspertët më të mirë për demarkim. Ne jemi të bindur që komisioni aktual në krye me Shpejtim Bulliqin, edhe njëherë do të vërtetojë humbjen e territorit. Pra, ne presim raportin përfundimtar të këtij komisioni”, ka thënë Haxhiu.
Në kundërshtim të Marrëveshjes për demarkimin e kufirit me Malin e Zi, opozita e kaluar kishte hedhur gaz lotsjellës brenda Kuvendit dhe pati organizuar protesta.
Në anën tjetër, Mali i Zi ka përjashtuar çdo mundësi që marrëveshja të rinegociohet.
