Kryeministri Ramush Haradinaj, ka reaguar pas deklaratës së anëtarit të kryesisë së (OVL – UÇK), Nasim Haradinajt për vrasjet e pasluftës.
Nasim Haradinaj, dje në një emision televiziv, ka deklaruar se nuk është “punë e madhe” që viktimat e vrasjeve politike kanë qenë anëtarë të LDK-së, deklaratë kjo që ka nxitur reagimin e ashpër të LDK-së dhe figurave politike.
Por, kryeministri Haradinaj, ka thënë se vrasjet politike të pasluftës do të hetohen nga institucionet e rendit dhe ligjit, përcjell Bota sot.
Në postimin e tij në Facebook, Haradinaj ka theksuar se prononcimet publike lidhur me këto raste, të çfarëdo natyre qofshin, nuk duhet të zbehin përgjegjësinë dhe detyrën e institucioneve të vendit për zbardhjen e tyre.
“Vrasjet e pasluftës, të figurave të shquara publike e politike, si krime, do të hetohen nga institucionet e rendit dhe ligjit. Këto vrasje janë plagë e dhimbshme dhe moszbardhja e të gjitha vrasjeve të pasluftës është turp për Kosovën, shoqërinë dhe institucionet e rendit dhe ligjit. Prononcimet publike lidhur me këto raste, të çfarëdo natyre qofshin, nuk duhet të zbehin përgjegjësinë dhe detyrën e institucioneve të vendit për zbardhjen e tyre”, ka shkruar Ramush Haradinaj./BS
