Hashim Thaçi brenda një viti ka ndërmarrë dy veprime ligjore pa marrë fare pëlqimin e ndërkombëtareve. Fillimisht, kishte hartuar një Ligj për themelimin e Ushtrisë me të cilin dështoi. Ndërsa, tash, provoi të shfuqizonte Gjykatën Speciale përmes një nisme, po ashtu tinëzare, duke i instrumentalizuar shoqatat e veteranëve dhe deputetët e PAN’it.
Hashim Thaçi në mars të këtij viti kishte ndërmarrë një nismë për ta shndërruar FSK’në në Ushtri të Kosovës. Madje, Ligjin e kishte dërguar në Parlament. Një muaj më vonë, më 7 prill, Presidenti kishte tërhequr Ligjin dhe kishte nisur konsultimet me ndërkombëtarët. Këta të fundit vazhdimisht kanë qenë kundër themelimit të Ushtrisë me Ligj. Kërkonin që një proces i tillë të bëhej duke ndryshuar Kushtetutën. Para dy ditësh, Thaçi e pranoi dështimin për të themeluar ushtrinë këtë vit. Premtoi se ushtria do të bëhet vitin e ardhshëm.
Por, Hashim Thaçi nuk është ndalur me iniciativa ligjore, pa u konsultuar fare me ndërkombëtarët, qysh ka bërë prej se ka marrë pak pushtet në Kosovë. Ish-Kryeministri Thaçi publikisht vazhdimisht është konsultuar sidomos me amerikanët për secilën çështje të rëndësishme për Shtetin. Në përgjimet e “PRONTO’s”, ish-Kryetari i PDK’së tallej pikërisht me amerikanët, duke thënë se “luaj k... me ta”.
“Hajt se luj k...e me ta, veç i thom të gjitha këto vendime kanë qenë në fuqi, po s’kanë qenë të vëmendshëm deputet që kanë votu…”, kishte thënë ish-kryeministri.
Por, duket se të premten mbrëma, Presidenti aktual dështoi të luajë me amerikanët, duke tentuar të shfuqizojë Gjykatën Speciale, përmes një nisme të fshehtë ligjore. Thaçi, duke instrumentalizuar shoqatat e veteranëve, kërkoi përmes 43 deputetëve të PAN’it të mbahej një seancë për shfuqizimin e Ligjit për Specialen.
Ambasadori amerikan në Kosovë, Greg Delawie, tha se veprimet e pozitës për të shfuqizuar Specialen është thikë pas shpine për SHBA’në. Tha se nisma erdhi pa kurrfarë debati dhe konsultimi paraprak.
"E gjithë kjo erdhi nga askund brenda disa ditësh, një çështje kaq e rëndësishme pa asnjë debat publik, kjo nga pikëpamja ime është një paturpësi", Delwie.
Ndërkohë, Ambasadori Britanik tha se nata e mbrëmshme kur u tentua të shfuqizohej Specialja është nata më e rëndë për Kosovën prej luftës.
Por, pse është themeluar Gjykata Speciale?
Përgjigja është e qartë: për t’i sqaruar akuzat që janë shkruar nga një zviceran, Dick Martyt, në një raport 30 faqesh, ku i bën përgjegjës udhëheqësit e UÇK’së për krimet e kryera gjatë dhe me krimin e organizuar pas luftës.
Për t’i hetuar këto akuza ishte emëruar edhe Prokurori, Clint Williamson, i cili kishte thënë se do të ngriten përafërsisht dhjetë aktakuza ndaj ish-udhëheqjes së UÇK’së.
“Ne besojmë se Task Forca do të jetë në gjendje të ngrejë aktakuza kundrejt disa ish-drejtuesve të lartë të UÇK-së për krime kundër Serbëve, Romëve dhe etnive tjera si dhe Shqiptarëve që janë besuar të kenë qenë bashkëpunëtorë të Serbisë dhe rivalëve politikë”, kishte thënë Williamson, në korrik, të vitit 2014.
Ky Prokuror kishte përmendur numrin dhjetë të aktakuzave, por jo edhe numrin e të akuzuarve, shkruan Gazeta Express.
"Kaq, pak a shumë, ndoshta me pak por afërsisht 10 aktakuza”, kishte shtuar ai.
Deri më tash, askush s’ka përmendur emrat e atyre që do të akuzohen, por Prokurori Williamson, kishte treguar adresën se ku janë ata njerëz që do të ndiqen penalisht.
“Nuk do të hyjë në specifika për të folur për individë, por të dhënat tona janë në koherencë me atë që ka thënë Dick Marty në raportin e tij, që këta individë kanë qenë në menaxhment të lartë të UÇK’së”, kishte shtuar ai.
Në vend të Williamson është emëruar amerikani David Schwendiman është emëruar në postin e kryeprokurorit të Grupit Hetues të Bashkimit Evropian, për hetimin e pretendimeve të raportit të Këshillit të Europës për krime lufte në Kosovë.
Por, kush janë emrat që përmenden në këtë raport?
Ata janë: Hashim Thaçi, Shaip Muja, Kadri Veseli, Azem Syla, Fatmir Limaj , Xhavit Haliti, Haradinaj janë personazhet kryesorë në Raportin e Dick Martyt.
Këta ish-udhëheqës të UÇK’së, Marty, i ndërlidh me veprime kriminale të kryera gjatë kohës së luftës dhe pasluftës.
Pesë herë përmenden emrat e udhëheqësve të UÇK’së në Raport?
Më së shumti përmendet emri i ish-udhëheqësit politik të UÇK’së, Hashim Thaçit. Pra, emri i tij figuron në pothuajse secilën prej 30 faqeve të Raportit. Konkretisht, pesë herë përmendet emri dhe mbiemri, ndërsa, 21 herë të tjerë mbiemri i tij. Në total, emri i Ish-Kryeministrit Thaçi përmendet 26 herë.
Pas tij vjen deputeti tjetër i PDK’së, Shaip Muja, i cili përmendet 20 herë në Raport. Ai ka pasur pozita edhe në Shtabin e Përgjithshëm të UÇK’së.
Pos tyre, në Raport përmendet shtatë herë edhe emri i Kadri Veselit, aktualisht, Kryetar i Kuvendit të Kosovës.
Gjashtë herë përmendet edhe emri i Fatmir Limajt, aktualisht, deputet dhe udhëheqës i një partie të vogël politike.
Azem Syla dhe mbiemri Haradinaj përmenden nga dy herë në raport.
Emërtimi “Grupi i Drenicës” përmendet pesë herë, ndërsa, udhëheqës i tij, thuhet se është Lideri i PDK’së, Hashim Thaçi.
“Ky lloj aktiviteti kriminal ka vazhduar të veprojë edhe pas luftës në forma të tjera, të ndërlidhura me krimin e organizuar, derisa Misioni Evropian për Sundimin e Ligjit, EULEXi zbuloi rastin e klinikës Medicus në Prishtinë për trafikim organesh”, thekson raporti.
“Disa anëtarë të tjerë të ‘Grupit të Drenicës’ na janë dhënë indikacione gjatë hulumtimit se kanë luajtur rol vital si bashkëkonspiratorë në aktivitete të ndryshme kriminale. Këtu përfshihen Xhavit Haliti, Kadri Veseli, Azem Syla dhe Fatmir Limaj. Të gjithë këta janë hetuar vazhdimisht gjatë dekadës së fundit si të dyshuar për krime lufte dhe ndërmarrje të përbashkëta kriminale, duke përfshirë raste të mëdha të udhëhequra nga UNMIKu, Tribunali i Hagës, dhe EULEXi. Deri më sot, të gjithë i kanë ikur drejtësisë”, shkruan mes tjerash Marty.
“Burimet e drejtpërdrejta që disponojmë tregojnë në mënyrë të besueshme se Haliti, Veseli, Syla e Limaj, si dhe Thaçi e anëtarët e tjerë të rrethit të bashkëpunëtorëve të tyre të ngushtë, do kenë urdhëruar, e ndonjëherë do kenë ndjekur edhe personalisht, realizimin e një numri vrasjesh, burgosjesh, agresionesh dhe marrjesh në pyetje, në rajone të ndryshme të Kosovës dhe konkretisht, çka na intereson në mënyrë më të veçantë, gjatë operacioneve të kryera nga UÇK-ja në territorin shqiptar, në vitet 1998-2000”, thuhet në raport.
“Gjatë hulumtimeve tona, kemi pasur të dhëna se shumë anëtarë të tjerë të njohur të “Grupit të Drenicës” kanë qenë bashkëfajtorët kryesorë të llojeve të ndryshme.
