(E plotësuar) - Në vazhdimin e seancës parlamentare pati përplasje ndërmjet kryesuesit të seancës Xhavit Haliti dhe deputetes së LVV-së, Albulena Haxhiu për miratimin e rekomandimeve të dy grupeve parlamentare që kanë bërë mocionin për interpelancën e kryeministrit Ramush Haradinaj, sipas kërkesës së GP të LDK-së dhe GP të Lëvizjes Vetëvendosjes lidhur me vendimin e Qeverisë për rritjen e pagave të anëtarëve të Kabinetit qeveritar, të të gjitha kategoritë e të punësuarave që marrin paga nga buxheti i Kosovës, si dhe vendimi për lartësinë e pagesës mujore për familjet në skemën e ndihmave sociale.
Kështu që është bërë i pamundur kuorumi për të votuar këto rekomandime të këtyre dy grupeve.
Deputetët Albulena Haxhiu dhe Avdullah Hoti kanë kundërshtuar mënyrën e votimit dhe ndërhyrjen e kryeministri Haradinaj te deputetët e PDK-së për të mos votuar këtë rekomandim.
Haxhiu: Haradinaj kërkoi nga Pajaziti të mos marrë pjesë në votim
“Ajo çfarë desha unë me ngritur këtu, është se para se të filloi procedura e votimit, kryeministri shkoi te deputeti Zenun Pajaziti për të kërkuar që mos me marrë pjesë në votim. Kjo është mbytje e republikës parlamentare, për shkak se nuk ka të drejtë Qeveria me ndërhyrë në punën e Kuvendit dhe në mandatin e lirë të deputetit”, ka thënë deputetja Haxhiu.
Ndërsa, kryesuesi i seancës Xhavit Haliti ka thënë se është e drejtë e kryeministrit Haradinaj që të kërkojë mendimin e deputetëve.
Haliti: Kryeministri ka nevojë të kërkojë nga deputetët mendimin për të votuar
“Kryeministri, sa i përket pozitës dhe opozitës mundet me komunikuar në mënyrën e vetë që dëshiron edhe në foltore mundet me kërkuar për të mos e votuar. Nuk është kurrë farë shkelje, edhe në foltore mundet me kërkuar mos e votoni. Problem është i deputetit si vendos. Nuk ka drejtë kjo, tash a domi me mbytë a?. Edhe një herë e përsëris votimin. Zenuni është fajtor a?”, ka thënë Haliti.
Shefi i Grupit Parlamentar të LDK-së, Avdullah Hoti ka kërcënuar se nuk do të marrin pjesë asnjë herë në votime të ligjeve në të ardhmen, sepse sipas tij, kjo është bërë qëllimshëm nga partitë në pushtet.
Hoti: Unë ju garantoj, se prej këtij momenti ne asnjë ligj nuk e votojmë
“Pesëdhjetë veta kanë votuar, seanca nuk mund të vazhdoj më tutje me pika të tjera të rendit të ditës pa o votuar kjo pikë. Nëse ka sjellje të tilla nga pozita, edhe pse ne e kuptojmë se nuk i përkrahin këto rekomandime është çështje e juaja. Por, nëse vazhdon kështu pozita me këto rekomandim për çka I propozuam dhe nuk merr pjesë fare. Unë ju garantoj, se prej këtij momenti ne asnjë ligj nuk e votojmë, as për, as kundër, as abstenim. Por, po ju them një gjë, seanca nuk mund të vazhdoj, sepse u konstatuar që nuk ka kuorum”, ka thënë Hoti.
Seanca e Kuvendit të Kosovës është ndërprerë pasi nuk pati kuorum. Për vazhdimin e seancës, Haliti tha se do të vendosë Kryesia në mbledhjen e radhës./I
Opozita lëshon seancën, ndërpritet seanca
Seanca e Kuvendit të Kosovës është ndërprerë pasi që nuk pati kuorum për t’u mbajtur ajo.
Mos kalimi i rekomandimeve të propozuara nga kryeministri Ramush Haradinaj solli edhe braktisjen e seancës nga deputetët e opozitës.
LDK dhe VV kanë lëshuar sallën ndërsa kryesuesi Xhavit Haliti tha se seanca ndërpritet pasi që nuk ka kuorum për t’u mbajtur ajo.
Për vazhdimin e seancës Haliti tha se do të vendos Kryesia në një mbledhje të saj.
***
Dy partitë opozitare LDK dhe Vetëvendosje e kanë lëshuar sallën e Kuvendit të Kosovës.
Kjo u bë si shenjë revolte ndaj mos votimit të rekomandimeve që ka propozuar LDK-ja në lidhje me interpelancën e kryeministrit Ramush Haradinaj.
Rekomandimet nuk morën miratimin e deputetëve ndonëse dy herë u votua për to.
Nuk votohen rekomandimet e LDK-së për interpelancën e Haradinajt
Deputetët e Kuvenditt ë Kosovës nuk kanë arritur që t’i votojnë rekomandimet e propozuara nga LDK në lidhje me interpelancën e kryeministrit Ramush Haradinaj në lidhje me vendimin e rritjes së pagave të kabinetit qeveritar.
Pas debatit të paradites rekomandimet u hodhën në votim por nuk pati kuorum për këtë. Në sallën e Kuvendit po marrin pjesë vetëm 50 deputetë.
Para se të hidhet në votim ishte deputetja Albulena Haxhiu e cila reagoi ndaj kryeministrit Haradinaj që sipas saj po bën presion tek deputetët e pozitës për të mos votuar.
Vazhdimi i seancës
Kuvendi i Kosovës është mbledhur sërish pas një pauze.
Paradite është mbajtur interpelanca e kryeministrit Haradinaj në lidhje me rritjen e pagave të kabinetit qeveritar.
Haradinaj përballet me kritikat e ashpra të opozitës
Kryeministri i Kosovës, Ramush Haradinaj është përballur me kritika të shumta të opozitës në Kuvend. Debati, është zhvilluar sipas kërkesës së Grupit Parlamentar të Lidhjes Demokratike të Kosovës dhe Lëvizjes Vetëvendosje, parti të cilat e kanë ftuar në interpelancë kryeministrin Haradinaj.
Me herët, subjekti opozitar, Lëvizja Vetëvendosje, e ka proceduar edhe në Gjykatën Kushtetuese vendimin e Haradinajt për rritjen e pagave për kabinetin e tij qeverisës si dhe për gjyqtarët dhe prokurorët.
Para deputetëve, Haradinaj tha se paga e kryeministrit, ashtu siç është pa rritje, radhitet në pozitën e 69, në një nivel me pagën e kryesuesve të Këshillit Gjyqësor dhe Prokurorial të Kosovës. Ai tha se paga e tij është meritore, nëse bëhet një krahasim i përgjegjësive dhe punëve që kryhen nëpër institucione.
"Kjo temë është në Gjykatën Kushtetues. Si e tillë unë pres përgjigjen e gjykatës. Vendimin e kemi pezulluar, sido që të vendosë gjykata ne e respektojmë. Qeveritarët, përfituesit e pagave, bëjeni një matematikë të thjesht e shihni se sa dalin. Janë një pakicë krejt e vogël, ndërsa shumicë si kategori që përfitojnë nga ky vendim janë gjyqtarët dhe prokurorët. T’ ju them të drejtën më dhimbset nëse ky vendim bie, jo për shkak timin apo ministrave, por më dhimbset për shkak të gjyqtarëve dhe prokurorëve", tha kryeministri Haradinaj.
Shefi i Grupit Parlamentar të Lidhjes Demokratike të Kosovës, Avdullah Hoti tha se vendimi për pagat është në kundërshtim më ligjet e aplikueshme në Kosovë. Ai kërkoi nga Qeveria që ta anulojë vendimin për rritjen e pagave.
"Vendimi është i papranueshëm. Kërkon diferencë të madhe në paga. Vendimi i tillë është i pamatur", tha Hoti.
Kurse, deputeti Albin Kurti nga Lëvizja Vetëvendosje tha se Qeveria Haradinaj, edhe ashtu me numër shumë të madh të ministrive, me 21 ministra 5 zëvendëskryeministra dhe 70 zëvendësministra, është duke e dëmtuar buxhetin. Ai tha po ashtu se t’ia rrisësh pagën vetës “është hajni”.
"T’ia rrisësh pagën vetes është hajni, është vjedhje, sepse vjedhja nuk është vjedhje sepse bëhet tinëz, por për shkak se është vjedhje. Ka vjedhje açik për shembull kjo rritje e pagave. Kjo është veçse pasojë e fundme e një fenomeni të hershëm", tha Kurti.
I shpejtë ka qenë edhe reagimi i kryeministrit Haradinaj, duke i reaguar Kurtit për konstatimet e tij për hajni.
"Qeveria e madhe me zëvendëskryeministra, ministra , e dimë që është harxhim, e dimë që rritja e pagave e ministrave e kryeministrit është harxhim i vendit mund të jenë rreth 30 mijë në muaj 300 mijë a 400 në vit, po i marrim ato i shpërndajmë të shohim çka mundemi të bëjmë me to. Kur të doni i shpërndajmë diku tjetër dhe e shohim se çka përmirësoni", tha Haradinaj.
Ndërkohë, ministri i Financave, Bedri Hamza tha se vendimi i për rritjen e pagave nuk ka bërë asnjë implikim në buxhetin e Kosovës dhe, siç u shpreh ai, edhe nëse zbatohet vendimi i Qeverisë për rritjen e pagave nuk mund te ketë implikime në buxhet. Sipas tij, nuk është hera e parë që në Kosovë kërkohet rritje e pagave në Qeveri.
"Nuk ka pasur asnjë efekt financiar. Nuk është në zbatim, është duke u qartësuar situata juridike", tha Hamza.
Deputeti nga radhët e LDK-së, Lumir Abdixhiku tha se nuk pajtohen me arsyetimet e kryeministrit të cilat i ka dhënë lidhur me rritjen e pagave.
"Përbën konflikt interesi, kur dikush i rritë pagën vetit, dhe në demokraci të zhvilluara këto janë të parandaluara. E dyta ka të bëjë me arsyetimin e dhënë, të parën e nuk e marr seriozisht, blerjen e kravatave, por të dytën për shmangien së korrupsionit e marr më seriozisht. Besoj se lufta kundër korrupsionit është çështje e bindjes, pra kur ke bindje nuk varesh prej nivelit të pagës", tha deputeti Abdixhiku.
Deputetët e partive politike në pushtet kanë arsyetuar vendimin e Qeverisë së Kosovës për rritjen e pagave. Ata kanë vazhduar debatin duke u kthyer përgjigje kritikave të deputetëve në opozitë.
Në fund të vitit të kaluar, kryeministri i Kosovës Ramush Haradinaj, kishte marrë vendim për rritjen e pagave për kabinetin qeveritar, ndërkaq më pas edhe për punonjësit e sistemit të drejtësisë.
Ky vendim më pas ishte pezulluar nga vetë kryeministri Haradinaj, pas një vërejtjeje që kishte parashtruar Agjencia Kosovare Kundër Korrupsionit, e cila e kishte cilësuar vendimin e kryeministrit si të paligjshëm.
Vendimi i Qeverisë kishte ndikuar që edhe punonjësit e sektorit të shëndetësisë dhe ata të arsimit të kërkojnë rritjen e pagave. Edhe pse që nga fillimi i këtij viti, punonjësit e sektorit publik kanë marrë pagat me rritje prej 4 për qind. Sindikata e Bashkuar për Arsim Shkencë dhe Kulturë është shprehur e pakënaqur me rritjen aktuale, duke kërkuar që rritja të realizohet nga 15 deri në 25 për qind.
Edhe mjekët specialistë në institucione publike shëndetësore, kanë kërkuar kategorizim, që do t’u mundësonte atyre rritjen e pagave.
Fondi Monetar Ndërkombëtar (FMN) ka vlerësuar se rritja e pagave apo çdo punësim i ri, duhet të bëhet brenda limitit të rregullës së re për fondin e pagave.
***
Deputetët e Kuvendit të Kosovës do të kthehen në seancë në ora 15:15, për të vazhduar seancën në të cilën do të votohet mocioni për shfuqizimin e vendimit të Qeverisë me të cilën rriten pagat për kabinetin qeveritarë, gjyqtarët dhe prokurorët.
Pak para se seanca të shkojë në pauzë, u kërkuar që LDK dhe VV të takohen për të harmonizuar rekomandimet që duan ta nxjerrin në votim.
Vazhdon debati në Kuvend, ankohet Ramush Haradinaj
Kryeministri i Kosovës, Ramush Haradinaj, i ka thënë deputetëve që mos të bëjnë moral të rrejshëm në lidhje me pagat, derisa theksoi se i ka mbet merak një krevat e vendosur në rrethojat e Qeverisë së Kosovës.
Deputetja e Vetëvendosjes, Fitore Pacolli tha se Qeveria me politikat e saj po vazhdon të mirëmbaje sistemin e padrejtë, ku i pasuri po vazhdon të bëhej më i pasur dhe i varfëri më i varfër
Sipas saj, po të ishte VV në qeverisje sot do të diskutohej për nivelizimin e pagave dhe për barazi sociale
Asaj iu ka kundërpërgjigjur Haradinaj, duke i thënë se ata as në opozitë nuk kanë penguar me gaz të bëhet ligji për nivelizimin e pagave.
Haradinaj: Më mbeti merak një krevat të vjerrur në rrethojat e Qeverisë
“E keni lënë Kosovën në një moral të rrejshëm, ordiner dhe po doni ta mbijetoni atë moral të rrejshëm, nuk është ashtu më, nuk është koha që duhet ta kesh jakën e këmishës së kçyer për t’u dok i moralshëm, ose që po i pinë dy kafe më shumë dhe qenke i keq, ka shkuar ajo kohë, vet jemi deklaruar për një rend shoqëror të tillë, për një ekonomi të tregut, nëse doni ta zhvilloni këtë vend, mos i leni njerëzit që kanë përgjegjësi të nëpërkëmbur, si imunitetin e deputetit që e keni heq tash po mundohemi ta kthejmë edhe këta të gjykatës janë të dikujt, të gjithë jemi me parti e pa parti, e dimë si jemi. Nuk jam kundër kritikës për ngritjen e pagave, është me vend, e kam mirëprit çka kanë thënë qytetarët, i kam mirëprit edhe kravatat dhe më ka mbetur merak një, e kam pa të vjerrur, por mosni moral të rrejshëm se e morët në qaf këtë vend kështu”, tha ai.
Ai ka mohuar se zëvendësministrave iu ka rrit paga, derisa i ka thënë deputetit Sali Zyba që shpreson ta arsytojë pagën prej 2000 eurove si deputet dhe nëse i tepron le ta ndaj me të varfëritë.
Haradinaj: Po merr rrogë të paarsyeshëm
“Unë e marrë sot 1400-1500, me rritje 2900, t’i e merr 2000, unë kesh ka të them me çdo normë shumë më badihava po e merr ti“, tha ai.
Sipas tij, gjatë gjashtë muajve të kësaj qeverie janë kryer punë të mirë por nuk mund të kryejnë punët për një ditë./KosovaPress/
Haradinaj: Shteti jep para edhe në të zezën
Kryeministri i Kosovës, Ramush Haradinaj, duke replikuar me deputetët ka thënë se duhet të dihet se shteti është shtet dhe ka disa shpenzime, obligime dhe jep para edhe në të zezën.
Haradinaj: Është një farë fukarallëku që po e shoh
“Kjo ideja e shumë prej juve sa të ndershëm jeni me kursye popullin po del hipokrite sepse ne krejt e njohim njëri tjetrin dhe e dimë që i keni marrë krejt këto mëditje kur iu ka ardhë rendi, jeni shku, jeni hy e jeni dal, amo ndaluni diku sepse janë gjëra që i di populli, i kemi listat kush ka marrë mëditje, mundemi me i nxjerr me ua publiku diku edhe të gjithë marrin, nëse është problemi krejt i trajtojmë po e bëjmë një paket dhe vendim çka. .....Është pak e habitshme për mua, është një farë fukarallëku që po e shoh ku doni me ardhe, edhe pak duam me i kursye edhe letrat, mos të blejmë nja 10 letra, o shteti është shtet i ka do shpenzime, i ka do obligime, e ka një reprezentacion, jep para edhe në të zezën, ka raste të caktuar jep shteti për projekte të caktuara, për tema të caktuara, si në planin e brendshëm si ndërkombëtar, analizoni pak, ka mënyra të shmangies së procedurave, nuk mundesh me kthyer shtetin në kur simin në institucion“, tha Haradinaj.
Haradinaj: S’duhet me pas jakën e këmishës të shqyer për të tregu ndershmëri
Kryeministri i Kosovës, Ramush Haradinaj i është përgjigjur pyetjeve dhe kritikave të deputetëve të Kuvendit sa i përket rritjes së pagave.
Ai ka thënë se gjatë qeverisjes së tij janë rritur shumë punë të mëdha.
“6 muaj të kësaj qeverisje janë kryer punët më të mëdha për vendin. Nuk mundem me i korigju 20 vjet që kaluan, diku në vend përgjegjësia duhet ti ketë parametrat e saj. Kemi gjetur qeverinë pa ligj, s’di kush e ka nal qeverinë me bo një ligj, ne nuk kemi gju gaz me ndalu ligjin për qeverinë. Pse s’u bo ligji për nivelizim të pagave, kështu e kam gjet qeverinë unë”, ka theksuar Haradinaj.
Ai ka kujtuar kohën kur ishte vet deputet i Kuvend, duke thënë se edhe atëherë rriteshin pagat dhe një gjë e tillë ishte normale.
“Janë 120 veta që vendosin për fatin e 2 milionë njerëzve, pse duhet me i lënë me paga të vogla. Këto janë pallavra që i shesin plot. Gjendja përmirësohet me njerëz që punojnë. E keni lënë Kosovën në mural të rrejshëm ordiner, nuk është koha që me pas jakën e këmishës së shkyme me tregu që je i ndershëm, ka shku ai vakt. Ndaqi me zhvillu këtë vend mos e leni njerëzit që kanë përgjegjësi të jetë të nëpërkëmbur. Nuk jam kundër kritikës për pagat, e kam mirëprit kritikën, i kam mirëprit krevatat dhe më ka mbet merak një, nuk kanë qenë aty kur erdha i kishin heq prej rrethojave”, ka përfunduar Haradinaj.
Deputeti i AAK-së, Blerim Kuçi dhe deputetja e Vetëvendosjes Albulena Haxhiu janë përplasur rreth pagës së kryeministrit dhe pagës së deputetëve.
Kuçi tha se vet Haxhiu e ka pagën 100 për qind më të madhe se sa kryeministri, derisa ai vet e ka 48 përqind pagën më të madhe se kryeministri.
Kuçi: Haxhiu e ka pagën 100 përqind më të madhe se kryeministri
“120 deputetë këtu që jemi në sallë e kemi pagën me të madhe se kryeministri i Kosovës. Edhe nismëtarët, ata që i prinë kësaj nisme e kanë pagën më të madhe se kryeministri. Shembull, deputetja Albulena Haxhiu e ka pagën 100 përqind me të madhe, ose merr në fund të vitit pagë më të madhe se kryeministri i Kosovës. Edhe unë tash që po flas e kam pagën 48 mbi pagën e kryeministrit të Kosovës. Disa shokë të mi që janë anëtarë të bordeve të disa ndërmarrjeve e kanë pagën 400 përqind më të lartë se kryeministri i Kosovës dhe ata takohen vetëm 12 herë në vit. Ose më mirë të themi kanë 12 ditë punë në vit”, tha Kuçi.
Kjo ka nxitur replikën e deputetes Haxhiu, e cila tha se pajtohet që paga e deputetëve është e lartë.
Haxhiu: Zotëri Kuçi, në imazhin tënd Kosova duket që është republikë qeveritare
“Zotëri Kuçi, në imazhin tënd Kosova duket që është Republikë qeveritare, kështu duke të dëgjuar çka po flet t’i konsideron se Kosova është Republikë qeveritare dhe po harron në fakt që Kosova është Republikë parlamentare dhe institucioni më i lartë në këtë vend është Kuvendi. Unë pajtohem plotësisht me ty që paga e deputetit është e lartë, dhe prandaj do të mbështes çfarëdo nisme që ka për qëllim uljen e pagës së deputetit. Është e papranueshme që deputeti të marrë pagë ndoshta shtatë fish se paga mesatare në vend dhe këtu po e them, jo vetëm unë por edhe grupi parlamentar i VV-së do të mbështes, ata që kanë nevojë për rritje janë qytetarët”, theksoi Haxhiu.
LDK me mocion kundër ngritjes së pagave për kabinetit qeveritar, Haradinaj: Nuk më dhimbset vetja
Kryeministri i Kosovës, Ramush Haradinaj ka deklaruar se vendimin që ka marrë i prek një pakicë të qeveritarëve dhe shumica që fitojnë janë gjyqtarët dhe prokurorët.
Haradinaj në seancën e sotme, ku pikë e rendit të ditës është interpelanca e kryeministrit për ngritjen e pagave të kabinetit qeveritar, ka thënë se një pagë e lartë për presidentin, deputetin, është një pagë e dinjinjitetshem që duhet ta kenë.
Sipas tij, ky vendim i qeverisë e ka një implikim te gjyqtarët dhe prokurorët.
“Qeveritarët dalin një pakicë e vogël, ndërsa shumicë që përfitojnë nga ky vendim janë gjyqtarët dhe prokurorët. Nëse ky vendim bien më dhimbset jo vetja e ministrat por më dhimben gjyqtarët e prokurorët”, tha ai.
Kurti: Rritja e pagave rehatim i partnerëve të koalicionit
Kryetari i VV-së Albin Kurti duke folur në seancën e Kuvedit ku po mbahet interpelanca e kërkuar nga LDK për rritjen e pagave për kabinetin qeveritar nga kryeministri Ramush Haradinaj.
Kurti tha se shtatë Ministri janë të panevojshme ndërsa theksoi se në vend që të jenë 14 zëvendësministra janë 70.
Kurti tha se kjo Qeveri e madhe u bë e rëndë ndërsa pas vendimit të rritjes së pagave dhe akuzave tnga shoqëria civile dhe mediat morën vendim që të rritet paga e shërbyesve civilë.
Kurti tha se ky vendim i Qeverisë Haradinaj është rehatim i partnerëve të koalicionit.
Ajo u akuzuar ashpër nga tri javë më vonë ia rritu pagën edhe shërbyesve civilë
“70 veta janë rahat e bashkë me ta edhe familjarët e tyre. Kjo është një pakicë e imtë njerëzish që sundon”, tha Kurti.
Reçica: Ndihmat sociale janë ngritur në bazë të legjislacionit në fuqi
Ministri i Punës dhe Mirëqenies Sociale, Skender Reçica, duke folur për rritjen e ndihmës sociale, ka thënë se ngritja e ndihmës sociale për 20 %, është bazuar në legjislacionin në fuqi dhe do të ndikojë në zbutjen e varfërisë.
Ai tha se ndihma sociale është një burim i rëndësishëm për familjet që janë të varura për këto kategori.
Sipas tij, vlera mujore që nga themelimi i ndihmës sociale ka qenë ngritje vetëm dy herë, në vitin 2009, pesë euro dhe në vitin 2015 me 25 %.
“Aktualisht nga skema sociale përfitojnë mbi 26 mijë familje me mbi 160 anëtarë, të cilët marrin duke filluar nga 60 euro për një anëtar dhe 180 euro për familjet 15 anëtarëshe. Bazuar në legjislacionin në fuqi, shuma mujore e ndihmës sociale përcaktohet sipas numrit të anëtarëve të familjes dhe kostos së çmimit të konsumit të shportës së ushqimit, e cila duhet të harmonizohet me indeksin e çmimit të konsumit të shportës së ushqimit të publikuara nga Agjencia e Statistikave të Kosovës”, tha ai.
Ai shtoi se janë të vetëdijshëm që rritja prej 20 % nuk është e mjaftueshme por ministria ka përcaktuar që të angazhohen në punë nga një anëtar i familjes nga kategoria e dytë e përfituesve të ndihmës sociale, në mënyrë që mos të jenë të varur nga ndihmat sociale.
Hamza: Sektori i pagave duhet të rregullohet me ligj
Për të arsyetuar vendimet për rritje të pagave në foltore ka dal ministri i Financave Bedri Hamza i cili tha se sektori i pagave duhet të rregullohet me ligj.
Sipas tij ligjet që lidhen me reformën e Administratës Publike duhet të sillen në Kuvend dhe të aprovohen.
Duke iu drejtuar deputetes së VV-së Albulena Haxhiu, Hamza e ka pyetur atë nëse ka diku në ndonjë vend që deputeti e ka pagën dyfish më të madhe sesa ministri.
LDK me mocion kundër ngritjes së pagave për kabinetit qeveritar
Shefi i grupit parlamentar të Lidhjes Demokratike të Kosovës, Avdullah Hoti, duke lexuar mocionin kundër rritjes së pagave të kabinetit qeveritar, para deputetëve ka kërkuar që Qeveria të anulojë vendimin e kundërligjshëm për rritjen e pagave të kabinetit qeveritar dhe sa më parë ta sjellë ligjin për pagat në sektorin publik.
Hoti tha se meqë paga e kryeministrit është dyfishuar me rregullore duhet të dyfishohen edhe pagat e gjithë gjyqtarëve dhe prokurorëve
“Vendimi i qeverisë i tejkalon kompetencat e përcaktuara me rregulloren e punës së qeverisë e cila në asnjë dispozitë të saj nuk përcakton kompetencat dhe përgjegjësit e Qeverisë për caktimin e pagave për kryeministrin dhe kabinetin qeveritar, ky vendim është i papranishëm pasi krijojnë një diferencë të madhe me elemente diskriminuese në mes të të ardhurave të grupeve shoqërore dhe kabinetit qeveritare“, tha Hoti.
Haradinaj: Paga e kryeminsitrit të Kosovës është e 69-ta në Kosovë
Kryeministri i Kosovës Ramush Haradinaj tha se paga e kryeministrit të Kosovës është në numrin rendor 69 në Kosovë.
Në interpelancën që ka filluar në lidhje me këtë vendim me kërkesë të LDK-së, Haradinaj tha se në bazë të rangut të përgjegjësive që mban kryeministri dhe ministrat nuk munden me qenë në numrin 69.
Megjithatë Haradinaj tha se vendimi i tij është aktualisht në Gjykatën Kushtetuese dhe ai është pezulluar derisa Gjykata ta marr vendimin.
“Sido që të jetë ai vendim ne do ta respektojmë, por është e habitshme indiferenca që ka ndodh në të kaluarën, leje kryeministrin apo ministrin por kryetari i KGJK-së ose kryeprokurori me lënë në vendin e 69 tregon orientimin tonë”, tha Haradinaj.
Sa i përket skemave sociale, Haradinaj tha se e kanë obligim për këto kategori.
Shtyhet interpelanca e Haradinajt për rastin Dehari
Seanca e Kuvendit të Kosovës ka filluar me kërkesën e përfaqësuesve të Lëvizjes Vetëvendosje, për ta tërhequr interpelancën e kryeministrit të Republikës së Kosovës, Ramush Haradinaj, lidhur me vdekjen e aktivistit të Lëvizjes Vetëvendosje, Astrit Dehari.
Me vota unanime, është miratuar mocioni i Lëvizjes Vetëvendosje për ta shtyrë për një seancë tjetër interpelancën e kryeministrit Ramush Haradinaj për rastin Dehari.
Fillon seanca, merr pjesë edhe Lista Serbe
Ka filluar seanca e Kuvendit të Kosovës, ku pritet që kryeministri I Kosovës Ramush Haradinaj të raportojë për vendimin për rritje të pagave.
Për dallim nga seancat e kaluara në të cilën pikë e rendit të ditës ishte ratifikimi I marrëveshjes me Malin e Zi, deputetët e Listës Serbe kanë ardhur në seancë.
Drejtpërdrejt nga vazhdimi i seancës, Haradinaj në interpelancë
Po vazhdon seanca e Kuvendit të Kosovës, ku në interpelancë do të jetë kryeministri Ramush Haradinaj.
Sipas agjendës, pas interpelancës së kryeministrit Haradinaj, sipas kërkesës së GP të Lidhjes Demokratike të Kosovës dhe GP të Lëvizjes Vetëvendosjes lidhur me vendimin e Qeverisë së Kosovës për rritjen e pagave të anëtarëve të kabinetit qeveritar, pastaj vendimin për rritjen e pagave për të gjitha kategoritë e të punësuarave që marrin paga nga buxheti i Kosovës, si dhe vendimi për lartësinë e pagesës mujore për familjet në Skemën e Ndihmave Sociale, do të ketë debat parlamentar, sipas kërkesës së nënkryetarit të Kuvendit, Kujtim Shala dhe gjashtë deputetëve nënshkrues lidhur me raportin e 100 ditëve të punës të Qeverisë së Republikës të Kosovës.
Po ashtu, do të shqyrtohet propozim-vendimi i Qeverisë së Republikës së Kosovës për ratifikimin e nëntë anëtarëve të Këshillit Shtetëror të Cilësisë, votimi i Raportit për gjendjen e mjedisit në Kosovë për vitin 2016 dhe interpelanca e kryeministrit të Republikës së Kosovës, Ramush Haradinaj, sipas kërkesës së Grupi Parlamentar të Lëvizjes Vetëvendosje, lidhur me vdekjen e dhunshme të aktivistit të Lëvizjes Vetëvendosje, Astrit Dehari.
