Anëtarësimi i Kosovës në COST hap mundësi të bashkëpunimit të shkencëtarëve tanë me shkencëtarë eminentë të fushave të ndryshme.
Kështu u tha në takimin e ministrit të Arsimit, Shkencës dhe Teknologjisë, Shyqiri Bytyqi me konsullin e Nderit të Kosovës në Austri, David Ungar-Klein.
Në takim u bisedua rreth zhvillimeve aktuale në sektorin e arsimit në Kosovë dhe mundësitë e bashkëpunimit të mëtutjeshëm në fushën e shkencës dhe teknologjisë.
Ministri Bytyqi u informua nga Konsulli David Ungar Klein, për hapat që ka ndërmarrë për anëtarësimin e Kosovës në programin e Bashkëpunimit Evropian në Shkencë dhe Teknologji (COST), ku Kosova do të pranohet si anëtar i parë fqinj.
Anëtarësimin e Kosovës si anëtar fqinj në COST, ministri Bytyqi e vlerësoi si një rast të mirë që të rinjtë tanë të përfitojnë fonde për programe, me të cilat ata aplikojnë në kuadër të COST.
