Asociacioni temë diskutimi në takimin ndërmjet Thaçit dhe Vuçiqit?

Aktuale

Asociacioni temë diskutimi në takimin ndërmjet Thaçit dhe Vuçiqit?

Më: 18 mars 2018 Në ora: 08:37
Takimi Thaçi-Mogherini-Vuçiq

Më 23 mars do të vazhdojë dialogu i nivelit të lartë ndërmjet Kosovës dhe Serbisë. Presidenti Thaçi dhe homologu i tij serb, Aleksandar Vuçiq do të vazhdojnë me diskutime gjatë javës së ardhshme.

Kjo u bë e ditur gjatë natës së mbrëmshme në një komunikatë zyrtare nga Bashkimi Evropian.

Njoftimi tregonte se temat kryesore do të jenë të lidhura me zbatimin e marrëveshjeve që janë arritur deri më tani.

“Ata do të vazhdojnë të diskutojnë për normalizimin e plotë të raporteve, dhe do të vlerësojnë punën e vazhdueshme në zbatimin e marrëveshjeve ekzistuese”, u tha në komunikatën e lëshuar nga zyra e Mogherinit.

Si temë kryesore e diskutimit, jozyrtarisht thuhet se do të jetë ajo për formimin e bashkësisë së komunave me shumicë serbe.

Një gjë e tillë ende nuk është konfirmuar por që serbët po e kërkojnë çdo ditë e më shumë, pasi është marrëveshje e arritur në Bruksel.

Lajmi.net ka tentuar të kontaktojë me këshilltarët e presidentit Thaçi që të kuptojë më shumë detjaje për temat e mundshme të diskutimit, por asnjëri nuk e ka hapur telefonin.

Formimin e Asociacionit e ka kërkuar sot në një konferencë për media edhe presidenti serb, Aleksandar Vuçiq.

Ai madje Kosovën e ka cilësuar si “e përkdhelura e ndërkombëtarëve”.

“Nuk pres asgjë pasi ne nuk kemi ç’të bëjmë të re përveç se të presim krijimin e asociacionit të komunave serbe në veri të Kosovës. Unë do të bisedoj dhe do të kujdesem për kompromis, jo të mbroj mitet por të ardhmen tonë”, deklaroi shefi i shtetit serb.

Deri më tani qeveria e Kosovës nuk ka ndërmarrë ndonjë veprim konkret për formimin e Asociacionit.

Kjo temë do të diskutohet edhe në vazhdimin e dialogut në nivelin teknik, që do të vazhdojë nga 19 deri më 21 mars.

commentFirst article
Sot mund të lexoni Shfletoni kopertinat