Bordi i Bankës Qendrore të Republikës së Kosovës sot me shumicë votash zgjodhi Flamur Mrasori për kryetar të Bordit të BQK-së.
Mrasori ka punuar në BQK për mbi 11 vite ku ka ushtruar funksione të rëndësishme, përfshirë funksionin e Sekretarit të Bordit Ekzekutiv të BQK-së dhe të Këshilltarit të Guvernatorit.
Gjatë periudhës së shërbimit të tij në BQK, ai ishte i përfshirë në të gjitha proceset e rëndësishme për realizimin e objektivave të BQK-së.
Si kryesues i Komisionit për Integrime Evropiane të BQK-së, Mrasori ishte pjesëmarrës në procesin e dialogimit të MSA-së ndërmjet Kosovës dhe Bashkimit Evropian.
Po ashtu, ai ishte pjesëmarrës i rregullt i delegacionit të BQK-së në takimet vjetore të Fondit Monetar Ndërkombëtar dhe Bankës Botërore. Po ashtu, dy herë ka qenë zëvendësguvernator i përkohshëm i Kosovës në FMN gjatë takimeve vjetore.
Mrasori është profesor në Fakultetin Juridik të Universitetit të Prishtinës. Më 26 janar 2018 është zgjedhur nga Kuvendi i Kosovës dhe më 5 shkurt 2018 është emëruar nga presidenti i Kosovës në pozitën anëtar joekzekutiv i Bordit të BQK-së.